तनावग्रस्त मध्यपूर्वी १२ देशमा करिब १८ लाख नेपाली, कुन देशमा कति छन्?

इजरायल र अमेरिकाले इरानमाथि शनिबारदेखि संयुक्त आक्रमण गरिरहेको छ। आक्रमणबाट इरानका सर्वोच्च नेता आयतोल्लाह अली खामेनीसहित कम्तीमा ४० अधिकारी मारिएका छन्। उक्त आक्रमणपछि इरानले इजरायलसहित अमेरिकी अमेरिकी सैन्य आधारहरूलाई निशाना बनाएर मध्यपूर्वी देशहरू  दुबई, कतार, बहराइन, कुवेत, बहराइन र ओमान लगायत खाडी मुलुकमा पनि आक्रमण गरिरहेको छ।

इरानको समर्थनमा पाकिस्तानी नागरिकहरू पनि कराँची सहरमा रहेको अमेरिकी वाणिज्य दूतावासलाई लक्षित गरी आक्रमण गरेका छन्। त्यसक्रममा झडप हुँदा ९ जनाको मृत्यु भएको छ।

मध्यपूर्वी देशहरूमा तनाव बढेपछि त्यसको असर नेपालमा पनि पर्ने देखिन्छ। मध्यपूर्व धेरै नेपाली रोजगारीको खोजीमा जाने क्षेत्र भएकाले वैदेशिक रोजगारीमा रहेका नेपालीहरू पनि प्रत्यक्ष प्रभावित हुने देखिन्छ।

मध्यपूर्वी १२ देशहरूमा करिब १८ लाख नेपालीहरू रहेका छन्। परराष्ट्र मन्त्रालयको तथ्यांकअनुसार मध्यपूर्वका १२ देशमा अनुमानित १७ लाख ९५ हजार २८८ नेपाली रहेका छन्।

संयुक्त अरब इमिरेट्समा लगभग ७ लाख, साउदी अरबमा ३ लाख ४८ हजार ८६५, कतारमा ३ लाख ५७ हजार ९२३, कुवेतमा २ लाख ७५ हजार, इराकमा ३० हजार, बहराइनमा २८ हजार र ओमान २५ हजार नेपाली रहेका छन्।

यस्तै साइप्रसमा १७ हजार, इजरायलमा ६५ सय, लेबनानमा ६५ सय, इजिप्टमा ५ सय जना रहेका छन्। इरानमा १० जना रहेकोमा तीमध्ये ४ जना हालै फर्किसखेको मन्त्रालयले जनाएको छ।