झापा–४ मा १४ वर्षदेखि चहराइरहेको एउटा घाउ, जुन मुद्दाले आफ्नो प्रभाव बलियो पार्दैछन् थेबे

झापा: प्रतिनिधिसभा निर्वाचनका लागि अब मात्रै ३ दिन बाँकी छ। आगामी फागुन २१ गते हुने प्रतिनिधिसभा निर्वाचनका लागि सोमबार  दलका उम्मेदवार तथा कार्यकर्ता अन्तिम दिनको चुनावी प्रचारप्रसार र घरदैलोमा छन्। झापा–४ मा पनि चुनावी सरगर्मी उत्कर्षमा पुगेको छ। जहाँ यसपालिको चुनावमा प्रमुख एक मुद्दा बनेको छ कन्काई नदीको अधुरो पुल।

झापा–४ मा पर्दछ शिवशक्ति नगरपालिका र झापा गाउँपालिका अनि गौरिदह नगरपालिकाको केही र गौरिगञ्ज गाउँपालिकाको ठूलो हिस्सा।

हुलाकी राजमार्गअन्तर्गत झापा गाउँपालिका–२ र गौरीगञ्ज गाउँपालिका–१ जोड्ने ७२३ मिटर लामो कन्काई पुल निर्माण सुरु भएको १४ वर्ष बितिसक्दा पनि ५६ प्रतिशत मात्र काम हुनु यहाँका मतदाताका लागि एउटा चहराइरहने घाउ बनेको छ। ३४ करोड ९ लाखको लागतमा सुरु भएको यो पुल निर्माणमा भएको ढिलासुस्ती र ठेक्का रद्दका कारण यतिवेला अन्योलको अवस्थामा छ। त्यसको आक्रोश छ यहाँका मतदाताहरूमा। उनीहरूको एउटै प्रश्न छ– कन्काई पुल कहिले बन्छ?

त्यसलाई प्रमुख मुद्दाका रूपमा अघि सारेका छन् झापा–४ बाट नेपाली कांग्रेसका उम्मेदवार देउकुमार थेवे लिम्बूले। यो मुद्दासहित उनले अगाडि सारेका प्रतिबद्धताहरूका कारण यस क्षेत्रमा थेबेले आफ्नो प्रभाव बलियो पार्दै गएका छन्।

थेबे झापा जिल्ला कांग्रेस सभापति हुन्। उनी यसअघि २०७९ र २०७४ मा पनि यही क्षेत्रमा चुनावी प्रतिस्पर्धामा थिए। तर दुवैपटक नेकपा एमालेका लालप्रसाद साँवा लिम्बूसँग पराजित भए।

२०७४ मा १६ हजार बढी मतान्तरले पराजित भएक थेबे २०७९ मा त्यो मतान्तर ६ हजार ८६७ मा झार्न सफल भएका थिए। तर दुवैपटक निर्वाचित भएर सरकारमा सहभागी भए पनि एमालेबाट स्थानीय समस्या समाधान हुन नसक्दा यसपालि यहाँका मतदाताहरू मत फेर्ने मुडमा देखिन्छन्। थेबे भन्छन्, ‘मतादातालाई भेट्न पुग्दा पहिलो समस्या नै उनीहरूले पुल निर्माणबारे बताउँछन्। यसअघिका प्रतिनिधिले त्यसका लागि पहल नगरेकाले पनि जनता फेरिने मुडमा देखिएका छन्।’ पुल निर्माणसहित झापा ४ को विकासलाई प्रमुख एजेन्डा बनाएका थेबे यसपालि ढुक्क जस्तो देखिन्छन्।

विशेष महाधिवेशनबाट फेरिएको कांग्रेसका कारण पनि त्यसको प्रभाव यस क्षेत्रमा परेको देखिन्छ। कन्काई पुल नबनेका कारण स्थानीयमा देखिएको आक्रोश र निराशालाई आशामा बदल्न सक्ने उम्मेदवारका रूपमा मतादाताले थेबेलाई हेरेकोमा उनीहरू विशेष महाधिवेशनबाट कांग्रेसको नेतृत्व गगन थापाले सम्हालेका कारण पनि आशा पलाएको स्थानीय बताउँछन्। यसअघि एमालेलाई मत दिएका एक स्थानीय नाम नखुलाउने सर्तमा बताउँछन्, ‘यसपालि विगतमा जस्तो उधारो आश्वासनमा हामी अल्मलिँदैनौँ। भोट परिवर्तन गर्छौँ।’ विगतदेखि नै थेबेले कन्काई पुलसहितका विषयलाई प्रमुख मुद्दा बनाएकाले उनीप्रति आशावादी रहेको उनको भनाइ छ।

स्थानीय मुद्दामा भिजेको र जिल्लाकै नेतृत्व सम्हालेको हुनाले थेवेप्रति मतदाताको भरोसा बढी देखिएको कांग्रेस समर्थकहरूको दाबी छ।

झापा ४ मा १ लाख ३० हजार ७११ मतदाता रहेका छन्। उसो त थेबेलाई उनले दाबी गरेजस्तो सहज भने छैन। यहाँ यसअघि दुईपटक निर्वाचित एमालेका लिम्बू उम्मेदवार छन्। पछिल्ला ३ निर्वाचनमा निरन्तर एमालेले जित्दै आएका कारण पनि थेबेलाई एमालेको गढ भत्काउन त्यति सहज भने छैन। यस्तै जेनजी आन्दोलनपछि बलशाली देखिएको राष्ट्रिय स्वतन्त्र पार्टी (रास्वपा)ले शम्भुप्रसाद ढकाललाई अघि सारेको छ।

यस्तै नेपाली कम्युनिष्ट पार्टी (नेकपा)का  पुरुषोत्तम चुडाल र राष्ट्रिय प्रजातन्त्र पार्टी (राप्रपा)का भक्तिप्रसाद सिटौलासहित १६ उम्मेदवार यहाँ रहेका छन्। बलिया र परम्परागत दलभन्दा नयाँ र वैकल्पिक दलमा देशव्यापी ह्विम बढिरहेको बेला थेबेलाई यहाँ त्यति सहज नभए पनि स्थानीय मुद्दा र विकास योजनाका कारण यसपालि कांग्रेसप्रति स्थानीयको अपेक्षा देखिएको दाबी उनी गर्छन्।

स्थानीय मुद्दा, नयाँ दलप्रतिको आकर्षणलगायतले अबको झापा ४ ले कस्तो दिशा लिनेछ भन्ने भने आगामी फागुन २१ पछिको निर्वाचनबाट मात्रै टुंगो लाग्नेछ।