सम्पत्ति शुद्धिकरण: शंकर ग्रुपका शंकर छुट्दा छोरा सुलभलाई ५ दिन हिरासतमा राख्न अनुमति

काठमाडौँ: शंकर ग्रुपका सञ्चालक सुलभ अग्रवाललाई सम्पत्ति शुद्धीकरणसम्बन्धी मुद्दामा अनुसन्धानका लागि ५ दिन हिरासतमा राख्न प्रहरीले अनुमति पाएको छ। जिल्ला अदालत काठमाडौँले उनलाई अनुसन्धानका लागि ५ दिन हिरासतमा राख्न अनुमति दिएको हो।

सम्पत्ति शुद्धीकरण अनुसन्धान विभागका महानिर्देशक गजेन्द्र ठाकुरका अनुसार अग्रवाललाई बयानका लागि बोलाइएको थियो र सोही क्रममा उनी विभागको नियन्त्रणमा आएका हुन्। प्रहरी स्रोतका अनुसार उनलाई शुक्रबार राति नै पक्राउ गरिएको थियो भने आइतबार म्याद थपका लागि अदालतमा उपस्थित गराइएको हो।

अग्रवालमाथि हाल सम्पत्ति शुद्धीकरणसम्बन्धी अनुसन्धान जारी रहेको छ। अग्रवाल यसअघि २०७६ सालमा कोभिड-१९ महामारीका बेला थर्मल गन महँगो मूल्यमा बिक्री गर्न खोजेको आरोपमा पनि पक्राउ परेका थिए। त्यसपछि उनी तारेखमा रिहा भएका थिए।

यसअघि नै शंकर ग्रुपका अध्यक्ष शंकरलाल अग्रवाल र व्यापारी दीपक भट्ट पनि पक्राउ परिसकेकोमा बयानपछि आजै शंकर अग्रवाललाई रिहा गरिएको छ। सुलभ शंकरका छोरा हुन्।