आरसीओडी थप्ने विद्युत प्राधिकरणको तयारी, जलविद्युत आयोजनका प्रवर्द्धकलाई बोलायो

काठमाडौं। सरकार स्वामित्वको नेपाल विद्युत प्राधिकरणले जलविद्युत आयोजनाहरुको व्यावसायिक उत्पादन सुरु मिति (आरसीओडी) थप्ने भएको छ।

विद्युत प्राधिकरणअन्तर्गतको विद्युत व्यापार विभागले विकासकर्ताहरुलाई आयोजनाको आरसीओडी थप गर्नका लागि बोलाएको हो।

विद्युत व्यापार विभागले आरसीओडी सकिएका आयोजनाका विकासकर्ताहरुलाई सात दिनभित्र सम्पर्क गर्न भनेको छ।

विद्युत प्राधिकरणको २०७१ भदौ ३१ को सञ्चालक समितिको ६८८ औँ बैठकबाट निजी क्षेत्रका विद्युत प्रवद्र्धक कम्पनीहरूसँग सम्पन्न विद्युत खरिद बिक्री सम्झौता (पीपीए) र विद्युत जडान सम्झौता (ग्रिड कनेक्सन एग्रिमेन्ट) मा आफ्नो दायित्वमा पर्ने प्रसारण लाइन तथा सवस्टेशन निर्माण समयमा सम्पन्न नभएको अवस्थामा आरसीओडी थप्ने व्यवस्था गरेको छ।

विविध सर्तहरूको अधिनमा रही निर्माण सम्पन्न नभएका सम्बन्धित आयोजनाहरूको आरीओडी संशोधन गर्न स्वीकृति दिने निर्णय त्यसबेलाको सञ्चालक समितिले गरेको थियो। सोही व्यवस्थाअनुसार विद्युत प्राधिकरणले विकासकर्तालाई बोलाएको हो।

आयोजनाको विद्युत उत्पादनको अनुमतिपत्र प्राप्त, आयोजनाको वित्तिय व्यवस्थापन सम्पन्न भएको, आरसीओडी समाप्त हुनु अगावै संशोधनको लागि निवेदन पेशका अतिरिक्त आयोजनाले भौतिक निर्माण प्रारम्भ गरी प्राधिकरणको प्रसारण लाइन तथा सवस्टेसन निर्माण अनुपातमा उपलब्धि हासिल गरेको आधारमा म्याद थप्ने जानकारी प्राधिकरणले दिएको छ।