घोराही सिमेन्टको आइपीओ स्थगित, के हुन्छ आवेदन?

काठमाडौँ- नेपाल धितोपत्र बोर्डले घोराही सिमेन्टको आईपीओको सम्पूर्ण प्रक्रिया स्थगित गर्न निर्देशन दिएको छ। बोर्डले सूचना जारी गर्दै प्राथमिक सेयर निष्काशन गर्ने सम्पूर्ण प्रक्रिया रोक्नका लागि निर्देशन दिएको हो।

‘लगानीकर्ताहरुको सुरक्षा तथा हित संरक्षणलाई मध्यनजर गर्दै उक्त कम्पनीको रेटिङ्ग र सार्वजनिक निष्काशन सम्बन्धी कैफियतको जाँचबुझका लागि हाललाई घोराही सिमेन्ट इण्डष्ट्री लिमिटेडको सार्वजनिक निष्काशनको सम्पूर्ण प्रक्रिया स्थगन गर्न निर्णयानुसार जानकारी गराइन्छ,’ बोर्डले जारी गरेको सूचनामा उल्लेख छ।

बोर्डले यस विषयमा थप अध्ययन गर्ने जानकारी दिएको छ। ‘हामी एकदुई दिन अध्ययन गर्छौँ,’ बोर्डका प्रवक्ता मुक्ति श्रेष्ठले भने, ‘अध्ययनपछि आवेदनवापत लिइएको रकम फिर्ता गर्ने सम्बन्धमा छलफल हुन्छ।’

गत जेठ ३२ गते घोराही सिमेन्टले प्रिमियममा जारी भएको आइपीओमा ८५ लाख कित्ता आवेदन रद्द भएपछि सीडीएसीले चेतावनीपूर्ण सूचना जारी गरेको थियो। खातामा पर्याप्त पैसा नभई १० कित्ताको एक हजार लाग्ने ठानेर आवेदन दिनेका कारण भएको शंका गर्दै सीडीएससी सूचना जारी गरेको हो। प्रतिकित्ता ४३५ रुपैयाँ मूल्य तोकिएको भएपनि अधिकांशले १०० रुपैयाँ प्रतिकित्ताका आधारमा आवेदन दिएका थिए।

यो आईपीओको निष्कासन बन्द छिटोमा आज असार ४ गतेसम्म आवेदन दिने व्यवस्था गरिएको थियो। तर, यथोचित संख्यामा आवेदन प्राप्त भए पनि आवेदन प्रमाणित हुने प्रक्रियामा रहेकोले आवेदन दिने म्याद असार १४ गतेसम्म थप गरिएको सूचना कम्पनीले जारी गरेको थियो।

घोराहीले सर्वसाधारणमा ६९ लाख ११ हजार ६७० कित्ता सेयर निष्कासन गरेको थियो। उक्त सेयरका लागि हालसम्म ५ लाख २८ हजार १६६ जनाले २ करोड ४० लाख ५७ हजार १३० कित्ताका लागि आवेदन दिएका छन्। जुन मागभन्दा बढी हो।

कम्पनीले यतिधेरै आवेदन पर्दा पनि झुटो विवरणका कारण बिक्री अवधि थपिएको छ। धितोपत्र ऐनको दफा ९८ मा जालसाजीयुक्त कुनै क्रियाकलाप गर्नेलाई १ लाख रुपैयाँदेखि ३ लाख रुपैयाँसम्म जरिमाना र दुई वर्ष कैद वा दुवै सजाय हुने उल्लेख छ। यस्तो कारोबारबाट कसैलाई हानीनोक्सानी भएको छ भने सो समेत क्षतिपूर्ति भराइदिनुपर्ने कानुनमा छ।