विराटनगरमा ५ तारे ‘लेमन ट्री प्रिमियर’ होटल निर्माण अन्तिम चरणमा, एक अर्ब ७५ करोड लगानी

काठमाडौँ: कोशी प्रदेशको राजधानी विराटनगरमा पाँचतारे होटल सञ्चालनमा आउन लागेको छ। शुभ इन्टरनेसनल हस्पिटालिटी प्राइभेट लिमिटेडले होटल बनाइरहेका छ।

होटल निर्माण अन्तिम चरणमा पुगेको शुभ इन्टरनेसनलले जनाएको छ। केही महिनाभित्र होटल सञ्चालनमा ल्याउन तयारी शुभ इन्टरनेसनलको छ। होटलको लागत बढेर एक अर्ब ७५ करोड रुपैयाँ पुगेको छ।

यस्तै होटलको प्रतिकोठा लागत दुई करोड २० रुपैयाँ छ। पहिलाको भन्दा होटलको लागत १२ प्रतिशत बढेको शुभ इन्टरनेसनलले जनाएको छ।

यसअघि एक अर्ब ५१ करोड रुपैयाँ लाग्ने अनुमान गरिएको थियो। पहिला ५६ कोठा बनाउने प्रस्ताव गरिएकोमा हाल बढाएर ८० कोठा पुर्याइएको छ। यसले गर्दा होटलको लागत बढेको हो। आगामी वर्ष सन् २०२७ देखि होटलले ऋण तिर्न थाल्ने भएको छ।

होटलमा ७५ प्रतिशत बैंकको ऋण र २५ प्रतिशत संस्थापकको स्वपुँजी हुने गरी लगानी संरचना बनाइएको छ। जसअनुसार होटलमा एक अर्ब १२ करोड रुपैयाँ ऋण लगानी रहेको छ। बाँकी ६५ करोड रुपैयाँ स्वपुँजीबाट जुटाइएको शुभ इन्टरनेसनले जनाएको छ।

लेमन ट्री प्रिमियर सञ्चलनमा आएपछि विराटनगरको पहिलो पाँचतारे होटेल हुने अपेक्षा गरिएको छ।

होटल भारतको प्रसिद्ध ब्रान्ड ‘लेमन ट्री प्रिमियर’ को नाममा सञ्चालन हुने भएको छ। होटलको व्यवस्थापन कर्निसन होटल्स प्राइभेट लिमिटेडले लिएको छ। लेमन ट्री प्रिमियर भारतको राम्रो ब्रान्ड भएकाले होटललाई यसबाट राम्रो लाभ हुने अपेक्षा गरिएको छ।

होटल विराटनगरको भृकुटी चोकमा अवस्थित छ। कार्नेशन होटल्स प्राइभेट लिमिटेडले ‘लेमन ट्री प्रिमियर’ को ब्रान्ड नामअन्तर्गत होटल व्यवस्थापन र सञ्चालन गर्ने भएको छ।

होटल बन्नुअघि सन् २०११ मा नेपाल बजार इन्टरनेसनल प्राइभेट लिमिटेडको रूपमा स्थापना भएको थियो। यसले एक स्टोर सञ्चालन गरेको थियो। जुन सन् २०१९ मा बन्द भयो। प्रस्तावित होटल आर्थिक वर्ष २०२१ देखि सोही ठाउँमा निर्माण भइरहेको छ।

नेपाल–भारत सिमाना नजिक विराटनगरमा भएकाले लोकेसनबाट पनि होटलले फाइदा लिन सक्नेछ। भारतीय ब्रान्ड लेमन ट्री प्रिमियरको नाममा सञ्चालन हुने भएकाले भारतीय पर्यटक आउने अपेक्षा गरिएको छ।

कर्निसन होटल लेमन ट्री होटल लिमिटेडको सहायक कम्पनी हो। यो भारतको नयाँ दिल्लीलगायत ५० स्थानमा छ। भारतीय बजारमा विभिन्न ब्रान्डहरु जस्तै लेमन ट्रीमार्फत स्थापित छ।

प्रिमियर, सिट्रस क्याफे र रिपब्लिक अफ नुडल्स र भारतभर ५० भन्दा बढी स्थानहमा सञ्चालनमा छ।

होटलमा विनय चौधरी अग्रवालको २९, सीतादेवी चौधरी अग्रवालको २९, प्रशान्त तातेडको २२, कविन श्रेष्ठ, ११.२, देवकला श्रेष्ठको ४.१, गंगा खतिवडाको २.८ र पायल चौधरी अग्रवालको १.९ प्रतिशत हिस्सा रहेको छ। कम्पनीको अध्यक्षमा कविन श्रेष्ठ रहेका छन्।

सरकारले सहुलित दिने घोषणा गरेपछि मुलुकका प्रमुख पर्यटकीय गन्तव्य र सहरहरुमा तारेस्तरका होटल खुल्ने क्रम बढेको छ। होटल क्षेत्रमा बैंक तथा वित्तीय संस्थाको सवा दुई खर्ब रुपैयाँ बढी लगानी रहेको छ।