नेपालमा आधिकारिक सेवा सुरु, काठमाडौँमा चल्न थाले बाइक र कार

काठमाडौँ: विश्वव्यापी राइड–सेयरिङ प्लेटफर्म उबरले नेपालमा आफ्नो औपचारिक सेवा सुरु गरेको छ। कम्पनीले शुक्रबार नेपालमा सेवा शुभारम्भ गरेको घोषणा गर्दै दक्षिण एशियामा एक दशकपछि नयाँ बजारमा विस्तार गरेको जनाएको हो।

उबरका अनुसार नेपाल एशिया–प्रशान्त (एपीएसी) क्षेत्रको ११औँ बजार बनेको छ। कम्पनीले काठमाडौंमा चारपाङ्ग्रे सवारीतर्फ ‘उबर गो’ र ‘उबर कम्फर्ट’ तथा दुईपाङ्ग्रे सवारीतर्फ ‘उबर बाइक’ सेवा सञ्चालनमा ल्याएको जनाएको छ।

उबरका एशिया–प्रशान्त क्षेत्रीय महाप्रबन्धक डोमिनिक टेलरले नेपाललाई बढ्दो डिजिटल पहुँच, शहरी यातायातको आवश्यकता र सशक्त पर्यटन क्षेत्र भएको सम्भावनायुक्त बजारका रूपमा चित्रण गरे। उनले नेपालमा उबरको प्रवेश दक्षिण एशियामा कम्पनीको विस्तार यात्राको महत्वपूर्ण उपलब्धि भएको बताए।

आज जारी विज्ञप्तिमा भनिएको छ, ‘नेपालमा उबर सेवा सुरु गर्न पाउँदा हामी उत्साहित छौं। नेपाल हाम्रो विश्वव्यापी मोबिलिटी सञ्जालको महत्वपूर्ण हिस्सा बनेको छ। हामी यात्रु, चालक तथा पर्यटकहरूको आवश्यकतालाई सम्बोधन गर्दै नेपालको यातायात क्षेत्रको विकासमा योगदान दिन चाहन्छौं।’

संस्कृति, पर्यटन तथा नागरिक उड्डयन मन्त्रालयका सचिव मुकुन्द प्रसाद निरौलाले उबरको आगमनले नेपालको पर्यटन क्षेत्रलाई थप टेवा पुग्ने विश्वास व्यक्त गरे। उनले अन्तर्राष्ट्रिय पर्यटक तथा स्वदेशी यात्रुका लागि सहज र भरपर्दो यातायात सेवा उपलब्ध गराउन यसले सहयोग पुग्ने बताए।

यस्तै, पूर्वाधार विकास मन्त्रालयका सचिव गोपाल प्रसाद सिक्देलले उबरको प्रवेशले नेपालको आर्थिक सम्भावना र डिजिटल पूर्वाधारप्रतिको अन्तर्राष्ट्रिय विश्वासलाई प्रतिबिम्बित गर्ने बताए। स्मार्ट मोबिलिटी समाधानले शहरी यातायात व्यवस्थापन, रोजगारी सिर्जना तथा पर्यटन प्रवद्र्धनमा योगदान पुर्याउने उनको भनाइ छ।

कम्पनीका अनुसार नेपालमा स्मार्टफोन प्रयोगकर्ता संख्या वृद्धि, शहरीकरण, पर्यटन विस्तार तथा सहज यातायात सेवाको बढ्दो मागलाई मध्यनजर गर्दै सेवा विस्तार गरिएको हो।

सन् २०१० मा स्थापना भएको उबर हाल विश्वका ७० भन्दा बढी देशमा सञ्चालनमा छ। कम्पनीले हालसम्म ७५ अर्बभन्दा बढी यात्रा सेवा प्रदान गरिसकेको जनाएको छ।