फ्रन्टलाइनको क्षमता विस्तार अन्तिम चरणमा, आईपीओबाट १०० बेडको क्यान्सर सेन्टर बनाउने

काठमाडौँ: निजी क्षेत्रबाट सञ्चालित नोबेल कलेज अफ हेल्थ एन्ड एजुकेसन फाउन्डेसन लिमिटेडले फ्रन्टलाइन हस्पिटलको क्षमता बढाउन पूर्वाधार निर्माण गरिरहेको छ। हस्पिटलको पूर्वाधार निर्माणको काम अन्तिम चरणमा पुगेको छ।

हालसम्म ८७ प्रतिशत काम सकिएको नोबेल कलेजले जनाएको छ। पूर्वाधार सकिएपछि हस्पिटलको क्षमता बढेर दुई सय बेड पुग्नेछ। फ्रन्टलाइन हस्पिटलले हाल १०० बेड सञ्चालन गरिरहेको छ।

नोबेल कलेजले क्यान्सरको उपचार गर्न फ्रन्टलाइन हस्पिटलको थप क्षमता बढाउने भएको छ। कम्पनीले १०० बेडको क्यान्सर सेन्टर बनाउने भएको हो। क्यान्सर सेन्टरको काम प्रारम्भीक चरणमा रहेको नोबले कलेजले जनाएको छ। फ्रन्टलाइन ब्रान्डको नामबाट सञ्चालित अस्पतालको हालको क्षमता एक सय शय्या रहेको छ भने यो अस्पतालले विश्वस्तरीय चिकित्सा सेवा प्रदान गर्दै आइरहेको जनाएको छ ।

क्यान्सर सेन्टर बनाउन नोबेल कलेजले साधारण सेयर (आईपीओ) जारी गरी लगानी जुटाउने भएको छ। आईपीओ निष्कासन तथा बिक्री प्रबन्धकको रूपमा नबिल इन्भेष्टमेन्ट बैंकिङ लिमिटेडलाई नियुक्त गरेको छ।

कम्पनीको पुँजी तीन अर्ब ५० करोड रुपैयाँ रहेको छ। नोबेल कलेजले जारी पुँजीको २८.५७ प्रतिशत आईपीओ निष्कासन गर्ने भएको छ। संस्थापक समूहअन्तर्गत ७१.४३ प्रतिशत सेयर कायम रहने कम्पनीले जनाएको छ।

थप सेवा विस्तारका लागि, निर्माणको चरणमा रहेको थप दुई सय बेड क्षमताको जनरल र क्यान्सर रोगलाई मध्यनजर गरी बनाइने अस्पतालका लागि थप पुँजीको आवश्यकता पर्ने भएकोले कम्पनीले सार्वजनिक निष्कासनमा जान लागेको कम्पनीले जानकारी दिएको छ।अस्पतालले स्नातक तहसम्म नर्सिंङ तथा फार्मेसलगायतका शैक्षिक गतिविधिहरू पनि सञ्चालन गर्दै आइरहेको छ।

नौ महिनामा साढे ४४ करोड कारोबार

नोबेल कलेजले चालू आर्थिको नौ महिनामा व्यापार बढेर ४४ करोड ६० लाख रुपैयाँ पुगेको छ। गत वर्ष ४३ करोड ३० लाख रुपैयाँ मात्र व्यापार गरेको थियो। कम्पनीले नौ महिनामा गत वर्षको भन्दा बढी कारोबार गरेका सार्वजनिक गरिएको वित्तीय विवरणमा उल्लेख छ।

२०२४ मा २६ करोड ९० र २०२३ मा ३४ करोड ९० लाख रुपैयाँ कारोबार गरेको थियो। कारोबार बढेसँगै नोबेल कलेजको मार्जिन पनि बढेर २२.९१ प्रतिशत पुगेको छ। गत वर्ष २०.७९, २०२४ मा १६.९२ र २०२३ मा १७ प्रतिशत मार्जिन थियो।

गत आर्थिक वर्ष २०२५ मा औसत २८ प्रतिशत अकुपेन्सी थियो। यो वर्षको नौ महिनामा अकुपेन्सीदर बढेर ४९ प्रतिशत पुगेको छ। जसले गर्दा नौ महिनामा कारोबार बढेको हो। सञ्चालनको क्रमिक वृद्धि र बिरामीको आगमनमा सुधारले समर्थन गर्दछ।

सन् २००६ मा स्थापित नोबेल कलेज अफ हेल्थ एण्ड एजुकेशन फाउन्डेसनले सुरुमा प्यारामेडिकल, व्यवस्थापन र सम्बद्ध विषयहरूमा शैक्षिक कार्यक्रमहरू सञ्चालन गरेको थियो।

सन् २०११ मा नोबेल अस्पतालअन्तर्गत स्वास्थ्य सेवाहरू सुरु गर्दै शैक्षिक सञ्चालन र आधारभूत स्वास्थ्य सेवा वितरणलाई समर्थन गर्न १०० शैयाको क्षमता फ्रन्टलाइन हस्पिटल सञ्चालन गरिरहेको छ।

प्रदेशको स्वास्थ्य मन्त्रालयबाट २०० शय्याको अस्पतालको लागि आशयपत्र (एलओआई) प्राप्त गरेको थियो। नोबेल कलेजले फ्रन्टलाइन अस्पतालको स्थापनासँगै कर्पाेरेट स्वास्थ्य सेवा दिन थालेको हो। कम्पनीको अध्यक्ष नवराज पाण्डे रहेका छन्। कम्पनीमा उनको हिस्सा ४०.२७ प्रतिशत छ।

स्वास्थ्य बिमा सेवा, जीवनशैलीसँग सम्बन्धित रोगहरूको बढ्दो र स्तरमा सुधारले हस्पिटलमा विरामीको संख्या बढ्दै गएको छ। यसबाहेक कम्पनीले घना जनसंख्या भएको काठमाडौं उपत्यका भित्र यसको रणनीतिक रूपमा अवस्थित बहुविशेष (मल्टिस्पेसियालिटी) अस्पतालबाट लाभ उठाउने संभावना छ।