५ अर्ब २७ करोड बचत फिर्ता माग्दै काठमाडौँ महानगरमा ६ हजारभन्दा बढीको निवेदन

काठमाडौँ:  काठमाडौँ महानगरपालिकाको सहकारी विभागमा बचत रकम फिर्ता गराइदिन माग गर्दै ६ हजारभन्दा बढी बचतकर्ताले निवेदन दर्ता गराएका छन्। ती निवेदनमार्फत करिब पाँच अर्ब २७ करोड रुपैयाँ बराबरको बचत फिर्ता गराइदिन आग्रह गरिएको जनाइएको छ।

विभागका अनुसार बचत फिर्तासम्बन्धी माग राख्नेहरूको संख्या निरन्तर बढिरहेको छ। रकम फिर्ताको मागसहित निवेदन संकलन सुरु भएयता दैनिक रूपमा नयाँ उजुरीहरू थपिने क्रम जारी रहेको बताइएको छ।

अधिकांश निवेदक साना बचतकर्ता रहेको महानगरको भनाइ छ। तीमध्ये धेरैले एक लाखदेखि पाँच लाख रुपैयाँसम्म विभिन्न सहकारी संस्थामा बचत गरेको विवरण पेश गरेका छन्।

बचतकर्ताबाट प्राप्त उजुरीका आधारमा महानगरले समस्यामा परेका सहकारीहरूको अवस्था अध्ययन गर्दै रकम फिर्ता गराउने प्रक्रिया अगाडि बढाइरहेको जनाएको छ। यस क्रममा केही बचतकर्ताले आफ्नो बचत रकम फिर्ता पाइसकेको जानकारी पनि महानगरले दिएको छ।

हाल महानगरले उजुरी दर्ता गर्ने, सम्बन्धित पक्षबीच छलफल गराउने तथा सहमतिमार्फत समस्या समाधान खोज्ने काम गरिरहेको छ। विवाद समाधान हुन नसकेका विषय आवश्यक कानुनी प्रक्रियाका लागि सम्बन्धित निकायमा पठाइने व्यवस्था रहेको जनाइएको छ।

काठमाडौँ महानगरभित्र हाल एक हजार ९१२ सहकारी संस्था दर्ता रहेको तथ्यांक छ। तीमध्ये आधाभन्दा कम संस्थाले मात्रै नियमित रूपमा आफ्नो वार्षिक गतिविधिसम्बन्धी विवरण पेश गर्ने गरेका छन्।