समाजवादी मोर्चाबारे रविको टिप्पणी : हामीले नदेखेका दल होइनन्

काठमाडौँ- राष्ट्रिय स्वतन्त्र पार्टी (रास्वपा)का सभापति रवि लामिछानेले समाजवादी मोर्चा आफूहरूले चिनेकै दलले बनाएकाले यसले आफूहरूलाई खास फरक नपर्ने टिप्पणी गरेका छन्। पार्टी स्थापना दिवसका अवसरमा बिहीबार नयाँ पार्टी कार्यालय बालाजुमा आयोजित पत्रकार सम्मेलनमा उनले यस्तो टिप्पणी गरेका हुन्।

‘दलहरूले गठबन्धन चुनावमा गरेका होइनन् र? डा. स्वर्णिम वाग्लेको निर्वाचन क्षेत्रमा गरेको होइन र? दलहरूको लागि नयाँ होला त्यो मोर्चा, हाम्रा लागि नौलो कुरा होइन, घोषित, अघोषित मोर्चा तोडेर गत उपनिर्वाचनमा नयाँ रेडर्क नै राखेका हौं,’ सभापति लामिछानेले भने, ‘हामीले नदेखेको दलचाहिँ त्यहाँ देखेको छैन।’ जनताको मुद्दामा काम गर्ने गरी मोर्चाबन्दी गर्न आफूले संसदमै प्रस्ताव गरेको उनको भनाइ छ।

एक वर्षभित्र दलले महाधिवेशन गर्ने उनको भनाइ छ। रास्वपाले बिहीबार दिउँसो १ बजेदेखि चियापान कार्यक्रम आयोजना गरेको छ। चियापानमा प्रधानमन्त्री, मन्त्री, संसदमा प्रतिनिधित्व गर्ने सबै राजनीतिक दलमा शीर्ष पदाधिकारी, सांसदहरूलाई आमन्त्रण गरिएको पार्टीका केन्द्रीय सदस्य दीपक बोहराले जानकारी दिए।