ऋण नतिरेपछि व्यवसायी रुप ज्योतिको सम्पत्ति लिलाम गर्दै प्रभु बैंक

काठमाडौं। व्यवसायी रुप ज्योतिले ऋण नतिरेपछि प्रभु बैंकले धितोमा राखेको सम्पत्ति लिलामीको प्रक्रिया अघि बढाएको छ।

साविकको सेञ्चुरी कमर्सियल बैंक (हाल प्रभु बैंकमा समाहित) बाट लिएको ऋण नतिरपछि लिलामीको प्रक्रिया अघि बढाएको हो। ज्योतिले नर्थ फेस होटल प्रालि र नेपाल जनरल मार्केटिङ प्रालिले लिएको ऋण नतिरेको बैंकले जानकारी दिएको छ।

बैंकले होटल र नेपाल जनरलको स्वामित्वमा रहेको जग्गा लिलामी गर्न लागेको हो। सात दिनभित्र जग्गा लिलाम गर्न बैंकले बोलत्र आब्हान गरेको छ। यस्तै जमानतकर्ता रुप ज्योति, अभिक ज्योति र सुरुची ज्योतिको नाममा रहेको जमानत पनि लिलाम गर्ने बैंकले जनाएको छ।

ज्योतिले लिएको कर्जाको किस्ता (साँवा तथा ब्याज) भुक्तानी सम्बन्धि सर्त कबुलियत उल्लंघन गरेको तथा पटक पटक मौखिक एवं लिखित तरताकेता गर्दा समेत सोको पूर्ण बेवास्ता गरी ऋणी तथा जमानतकर्ताले कर्जा नियमित तथा चुक्ता गर्ने तर्फ चासो नदेखाई आलटाल गरेकाले लिलामी प्रक्रिया अघि बढाएको दाबी बैंकको छ।

कर्जा असूलीका बैंकले गत वैशाख ३१ गते बिहिबार कर्जा चुक्ता गर्ने ३५ दिने सार्वजनिक तथा धितोमा रहेको सम्पत्ति गोप्य शिलबन्दी बोलपत्र मार्फत लिलाम त्रिक्री गर्नका लागि सात दिने सार्वजनिक सूचना प्रकाशित गरेको थियो।

उक्त सूचना बमोजिम कर्जा चुक्ता तथा धितो लिलाम बिक्री हुन नसकेपछि गत असार २४ ऋणी तथा जमानतकर्तालाई कर्जा चुक्ता गर्न आउने १५ दिनको समय दिएको थियो।

सूचना बमोजिम कर्जा चुक्ता तथा धितो लिलाम बिक्री नभएपछि बैंकले तेस्रो पटक कर्जा असूलीका लागि सुरक्षणको रुपमा रहेका जग्गा गोप्य शिलवन्दी बोलपत्रको माध्यमबाट लिलाम बिक्री गर्ने जानकारी बैंकले दिएको छ। आउँदो सात दिनभित्र गोप्य शिलबन्दी बोलपत्र पेश गर्न भनेको छ।

बैंकले नर्थ फेस होटलको नाममा मालपोत कार्यालय चाबहिलमा दर्ता भएको २४ वटा कित्ता जग्गा लिलाम गर्न लागेको छ।

यस्तै नेपाल जनरलको नाममा मालपोत कार्यालय ललितपुरमा दर्ता भएको पाँच कित्ता, मालपोत कार्यालय पर्सामा दर्ता भएको सावकिको चोर्नी गाविसमा रहेको २, ४ र ५ नम्बर कित्ता, मालपोत कार्यालय डिल्लीबजार र कलंकीमा दर्ता भएको सबै जग्गा बिक्रीका लागि बैंकले शिलबन्दी बोलपत्र आब्हान गरेको हो।

रुप ज्योति र पद्म ज्योति दाजुभाईबीच लामो समयदेखि अंश विवाद छ। नेपाल जनरल हिरो होन्डा मोटरसाइकलको अधिकृत बिक्रेता थियो। हिरोको डिलरसीप खोसिएपछि ज्योति संकटमा परेका हुन। हिरो मोटरसाइकल हाल चौधरीको सीजी मोटरले बिक्री गर्दै आएको छ।