सुनसरी घटना: सीडीओ‌सहित सुरक्षा प्रमुखहरूलाई फिर्ता बोलाइयो

सुनसरीको देवानगञ्जमा साम्प्रदायिक हिंसा भड्किएपछि त्यहाँ प्रमुख जिल्ला अधिकारी (सीडीओ) वाशुदेव घिमिरेसहित जिल्लादेखि प्रदेश तहसम्मका सुरक्षा प्रमुखलाई फिर्ता बोलाइएको छ। गृहमन्त्रालयले सीडीओ घिमिरेलाई मन्त्रालय तानेर उनको स्थानमा संखुवासभाका सीडीओ ईश्वरीप्रसाद अर्याललाई जिम्मेवारी सुम्पिएको छ।

कोशी प्रदेशका प्रहरी प्रमुख डीआईजी विनोद घिमिरेलाई प्रहरी प्रधान कार्यालय फिर्ता बोलाइएको छ। उनको ठाउँमा डीआईजी शेखर खनाललाई पठाइएको छ।

यसैगरी, सुनसरीका प्रहरी प्रमुख एसपी केशव थेवेलाई गौतमबुद्ध विमानस्थल पठाइएको छ भने त्यहाँ कार्यरत एसपी पुष्पराज मल्ललाई सुनसरीको कमाण्ड सम्हाल्न पठाइएको छ। सशस्त्र प्रहरीतर्फ पनि जिल्लाका एसपी श्यामकुमार कार्की र कप्तानगञ्ज युनिटका डीएसपी नन्दकिशोर महतोलाई हटाएर क्रमशः एसपी लवकुमार सापकोटा र डीएसपी मदन नाथलाई जिम्मेवारी दिइएको छ।

आइतबार राति देवानगञ्ज–३ कप्तानगञ्जमा दुई समुदायबीच उत्पन्न विवादले उग्र रूप लिएको थियो। मन्दिरमा बजाइएको चर्को आवाज (डिजे) र बिजुलीको पोलमा झण्डा राख्ने विषयलाई लिएर सुरु भएको सामान्य खटपटले साम्प्रदायिक भिडन्तको रूप लिएपछि स्थिति नियन्त्रणमा लिन सुरक्षाकर्मीले बल प्रयोग गर्नुपरेको थियो। सो क्रममा स्थानीय ओमप्रकाश मेहताको गोली लागेर मृत्यु भएको छ। गोली लागेर अन्य ९ जना घाइते भएङ्का थिए।

भिडन्तमा सुरक्षाकर्मी र सर्वसाधारण गरी २४ जनाभन्दा बढी घाइते भएका छन्।

सोमबार त्यहाँ कर्फ्यु लगाइए पनि कर्फ्युकै बीच स्थानीयले प्रदर्शन गरिरहेका छन्।