अबको १० वर्षमा पैसाको कुनै महत्त्व रहन्न: एलन मस्क

–सन् २०३६ मा पैसाको कुनै महत्त्व हुनेछैन।

यो भनाइ हो विश्वकै सबैभन्दा धनी व्यक्तिमध्येका एक एलन मस्कको। उनले हालै ‘द इकोनोमिस्ट’को पोडकास्टमा यस्तो बताएका हुन्। ज्यानी मिन्टन बेडोजसँगको पोडकास्टमा उनले अबको १० वर्षमा एआई र रोबोटहरूले मानिसले उपभोग गर्न सक्नेभन्दा बढी सामान र सेवाहरू उत्पादन गर्ने बताए। प्रविधिको विकासले गर्दा सामान र सेवाहरू यति धेरै उत्पादन हुनेछन् कि कसैलाई पनि अभाव नहुने उनले बताए।

मस्कका अनुसार अबको करिब ५ वर्षमा एआईको क्षमता संसारका सबै मानिसको दिमाग जोड्दा जति हुन्छ, त्योभन्दा बढी हुनेछ। मानव हुनु’बाहेक एआईले मानिसले भन्दा राम्रोसँग गर्न नसक्ने कुनै पनि काम बाँकी नरहने उनको दाबी छ।

उनी भन्छन्, ‘तपाईँलाई पैसा किन चाहिन्छ? सामान र सेवाका लागि, हैन त? तपाईँलाई खाना, आवास, यातायात र मनोरञ्जनका लागि पैसा चाहिन्छ। यदि रोबोट र एआईले मानिसले उपभोग गर्न सक्नेभन्दा बढी यी सबै चीजहरू उपलब्ध गराउँछन् भने, त्यस्तो अवस्थामा तपाईँलाई पैसा किन चाहियो र?’

तर, रोबोटहरू मालिक हुने र पैसाको महत्त्व नरहने अवस्थामा लेनदेनको माध्यम के हुनेछ भन्नेबारे उनले केही बताउन सकेनन्।

भविष्यमा धेरैजसो काम मेसिन र एआईले नै गर्ने उनको भनाइ छ। ‘मानिसहरूले पैसा कमाउनका लागि काम गरिरहनु पर्दैन। मानिसहरूले आफ्नो इच्छा वा रुचिका लागि मात्र काम गर्नेछन्,’ उनले भनेका छन्।

मस्कका अनुसार अबको ५ वर्षमा एआईले मानव जातिको सामूहिक बुद्धिलाई उछिन्नेछ।

सन् २०३६ सम्ममा मानिसहरूले रोबोटमाथिको नियन्त्रण गुमाउन सक्ने चेतावनी पनि उनले दिएका छन्। किनभने एआईको बौद्धिक स्तर मान्छेको भन्दा धेरै माथि हुनेछ। ‘यदि एआई र मानिसबीचको बुद्धिको अन्तर, एआई र चिम्पान्जीबीचको अन्तरभन्दा धेरै बढी भयो भने, चिम्पान्जीहरूले शासन गरिरहेका छन् भनेर कल्पना गर्न गाह्रो हुन्छ,’ उनले भनेका छन्।

एआई र रोबोटको यो गतिलाई रोक्ने कुनै उपाय नभएको र त्यसलाई रोक्न पनि नहुने उनको भनाइ छ।

चीनले एआईको क्षेत्रमा धेरै छिटो प्रगति गरिरहेको मस्कले बताएका छन्। चीनले अब आफ्नै एडभान्स्ड चिप्स बनाउन थालेको र उसको  किमी के थ्री जस्ता एआई मोडलहरूले पश्चिमा देशलाई टक्कर दिइरहेको उनले उल्लेख गरे।