नेपाली भलिबल टिम सबै खेलमा पराजित

काठमाडौं – कीर्गिस्तानमा जारी काभा पुरुष भलिबल प्रतियोगितामा नेपालले सबै खेलका हार बेहोरेको छ। लिगको अन्तिम खेलमा नेपालले उज्वेकिस्तानसँग साझो सेटमा हार बेहोरेसँगै नेपाल सबै खेलमा पराजित भएको हो।

आइतबार दिउँसो सम्पन्न खेलमा नेपालले उज्वेकिस्तानसँग ३–० को सोझो सेटमा हार बेहोरेको थियो। नेपालले उज्वेकिस्तानसँग पहिलो सेटमा २५–२१ को हार बेहोरेको थियो। दोस्रो र तेस्रो सेट पनि उस्तै प्रतिस्पर्धात्मक रह्यो। यद्यपी नेपालले २५–२२ र २५–२३ को हार बेहार्यो। सिंगल राउन्ड रोबिन शैलिमा भएको खेलमा यो नेपालको अन्तिम र छैटौं हारसमेत हो।

बिस्केकको स्पोर्ट्स एण्ड रिक्रिएसन कम्प्लेक्समा भएको प्रतियोगिताको पहिलो खेलमा नेपालले मंगोलियासँग हार बेहोरेको थियो। गत आइतबार भएको खेलमा नेपाललाई मंगोलियाले ३–१ को सेटमा हराएको थियो। मंगोलियाले पहिलो र दोस्रो सेट २५–१९ र २५–२० ले जितेको थियो। तेस्रो सेट नेपालले २७–२५ ले आफ्नो बनायो। तर, चौंथो सेटमा मंगोलिया २५–२० ले विजयी हुँदै खेल आफ्नो पक्षमा पार्न सफल भयो।

त्यस्तै, नेपालले कीर्गिस्तानसँगै पनि सोही नतिजाको हार बेहोरेको थियो। किर्गिस्तानले नेपाललाई २६–२४,२१–२५,२५–१८ र २५–१६ ले हराएको हो। बलियो टोली इरानसँग त नेपालले राम्रो खेल देखाउने मात्र सोचेको थियो। खेल पनि त्यस्तै भयो र ३–० को हार बेहार्यो। तर ति सेटहरु भने कमजोर थिएनन्।

इरानसँग नेपालले पहिलो सेटमा २५–१६ को हार बेहोरेको थियो। त्यसको तुलनामा दोस्रो र तेस्रो सेट केही प्रतिस्पर्धात्मक देखिए। नेपालले ३–० को हार बेहोरे पनि अन्तिम दुई सेट भने २५–२२ मा नेपालले हार बेहोरेको थियो।

त्यस्तै, चौथो खेलमा नेपाललाई तुर्किमिनिस्तानले ३–१ को सेटमा हरायाे। दोस्रो सेट नेपालले २३–२५ जितेको भए पनि बाँकी सेटमा तुर्किमेनिस्तानले हात पार्यो। तुर्किमिनिस्तानले पहिलो, तेस्रो र चौथो सेटमा क्रमशः २५–१८,२६–२४ र २५–२० को सेटमा जित निकालेको थियो।

कीर्गिस्थानको बी टिमसँग पनि नेपालले हार बेहोर्यो। नेपालले आयोजक टोलीको बी टिमसँग ३–२ को सेटमा हार बेहोरेको थियो। नेपालले पहिलो सेट २५-२३ ले जितेको थियो। दोस्रो सेट र तेस्रो किर्गिस्तानले २९-२७ र २५-२२ ले आफ्नो बनायो। चौंथो सेट नेपालले २५-११ ले जितेपछि खेल पाँचौं सेटमा पुग्यो। त्यसपछि पाँचौं सेट १६-१४ ले जित्दै किर्गिस्तानले खेल आफ्नो बनाएको थियो।

अन्तिम खेलमा त उज्वेकिस्तानले सोझो सेटमा हराएको हो। काभा पुरुष भलिबलमा नेपालसहित आयोजकको दुई टोली, इरान, मंगोलिया, तुर्किमिनिस्तान उज्वेकिस्तान गरी सात टोलीको सहभागिता रहेको छ। सिंगल राउन्ड रोबिनमा हुने प्रतियोगिताको शीर्ष दुई टोली उपाधिका लागि खेल्ने छन्।