एनटीसीको संविधान दिवस अफर: ४९९ रुपैयाँमा ३० दिनसम्म अनलिमिटेड डाटा

काठमाडौँ: नेपाल टेलिकमले संविधान दिवस २०८३ को अवसरमा प्रिपेड तथा पोस्टपेड मोबाइल प्रयोगकर्तालाई लक्षित गर्दै विशेष डाटा अफर सार्वजनिक गरेको छ। कम्पनीले ‘अनलिमिटेड लाइट’ र ‘अनलिमिटेड प्रो’ गरी दुई प्रकारका प्याकेज उपलब्ध गराउने भएको हो।

टेलिकमका अनुसार ४९९ रुपैयाँ (करसहित) मा ३० दिनका लागि ‘अनलिमिटेड लाइट ४९९’ प्याकेज लिन सकिनेछ। यसमा दैनिक ५ जीबी डाटा उपलब्ध हुनेछ। दैनिक ५ जीबीको सीमा सकिएपछि पनि बाँकी समय २ एमबीपीएस गतिको अनलिमिटेड डाटा प्रयोग गर्न सकिनेछ।

त्यस्तै, धेरै डाटा प्रयोग गर्ने ग्राहकका लागि ६९९ रुपैयाँ (करसहित) मा ‘अनलिमिटेड प्रो ६९९’ प्याकेज उपलब्ध हुनेछ। यस प्याकेजमा ३० दिनसम्म दैनिक १० जीबी डाटा पाइनेछ। दैनिक १० जीबीको सीमा पूरा भएपछि बाँकी समय ३ एमबीपीएस गतिको अनलिमिटेड डाटा प्रयोग गर्न सकिने टेलिकमले जनाएको छ।

पोस्टपेड मोबाइल प्रयोगकर्ताका लागि भने प्याकेजमा रेन्टल चार्जसमेत समावेश गरिएको छ।

नेपाल टेलिकमका अनुसार संविधान दिवस अफर असोज २ गतेदेखि असोज ४ गतेसम्म तीन दिन मात्र उपलब्ध हुनेछ। ग्राहकले आफ्नो मोबाइलबाट *१४१५# डायल गरेर वा नेपाल टेलिकम एपमार्फत अफर लिन सक्नेछन्।