पहिलो हाफमा नेपाल र पाकिस्तानको बराबरी

काठमाडौं – बैंगलोरमा जारी १४ औं संस्करणको साफ च्याम्पियनसिपको आफ्नो अन्तिम खेलको पहिलो हाफमा नेपाल र पाकिस्तनले बराबरी खेलेका छन्। श्री कान्तिरवा रंगशालामा जारी खेलको पहिलो हाफमा दुवै टिमले गोलरहित बराबरी खेलेका हुन्।

खेलमा निकै राम्रा अवसर पाए पनि नेपालले गोल गर्न सकेन। खासगरी विमल मगरले खेलमा दुई गोल मिस गरेपछि नेपालले अग्रता बनाउने अवसर गुमाएको थियो।

खेलको १२ औं मिनेटमा गोलकिपरसँग पोस्टअघि वान टू वानको अवस्थामा उनले प्रहार गर्न सकेनन्। फलतः उनी पाकिस्तानी डिफेन्डरबाट फलको शिकार भए। त्यसपछि पाएको फ्रि किकमा पनि मगरले पोस्टको फ्रेममा प्रहार गर्न सकेनन्।

त्यस्तै, खेलको ३१ औं मिनेटमा पाकिस्तानले नेपालको गोलपोस्ट वरपर निकै राम्रो मुभ बनाएको थियो। पाकिस्तानका अलि खानले बलियो प्रहार गरे पनि गोलकिपर किरण लिम्बूले बचाएका थिए।

खेलको ४२ औं मिनेटमा नेपालले अर्को सुन्दर अवसर गुमायो। मैदानको बायाँ कुनाबाट आएको बलमा विमलले पोस्टअघिबाट प्रहार गरेका थिए। उनको प्रहार गोलकिपर ले फर्काइदिएका थिए।

रिबाउन्ड बल नेपाली खेलाडीले नै पाएको भए पनि नेपाली फरवार्डले पोस्टतर्फ पुन प्रहार गर्नै सकेनन्। नेपालले खेलको अन्तिममा केही थप अवसर बनाए पनि गोलका लागि अन्तिम प्रहार गर्न भने सकेन्। पाकिस्तानले पनि थप राम्रा मुभ बनाउन सकेन।