हिमालय एयरलाइन्सले काठमाडौं–साङ्घाई सिधा उडान पुनः सुरु गर्ने

काठमाडौँ: हिमालय एयरलाइन्सले काठमाडौँ–साङ्घाई सिधा उडान सेवा पुनः सञ्चालन गर्ने भएको छ। एयरलाइन्सले आगामी सेप्टेम्बर २८ देखि त्रिभुवन अन्तर्राष्ट्रिय विमानस्थलबाट चीनको साङ्घाई पुडोङ अन्तर्राष्ट्रिय विमानस्थलसम्म नियमित उडान सुरु गर्न लागेको हो।

एयरलाइन्सका अनुसार काठमाडौँ–साङ्घाई–काठमाडौँ रुटमा सुरुमा सातामा दुईवटा उडान सञ्चालन हुनेछ। काठमाडौँबाट सोमबार र शुक्रबार तथा साङ्घाईबाट मंगलबार र शनिबार उडान हुने तालिका छ।

काठमाडौँ–साङ्घाई उडान साँझ ६ः२५ बजे प्रस्थान गरी भोलिपल्ट बिहान २ बजे साङ्घाई पुग्नेछ। साङ्घाईबाट बिहान ३ बजे उडान भरेको विमान बिहान ७ः१० बजे काठमाडौँ आइपुग्नेछ। उडान समय स्थानीय समयअनुसार तोकिएको एयरलाइन्सले जनाएको छ। यो सेवा सेप्टेम्बर २८ देखि अक्टोबर २३ सम्मका लागि काठमाडौँ–साङ्घाईतर्फ र सेप्टेम्बर २९ देखि अक्टोबर २४ सम्म साङ्घाई–काठमाडौँका लागि सञ्चालन हुनेछ।

हिमालय एयरलाइन्सका अनुसार काठमाडौँ–साङ्घाई रुटमा सेवा पुनः सुरु भएसँगै कम्पनी यो क्षेत्रमा नियमित सिधा उडान गर्ने एक मात्र व्यावसायिक वायुसेवा बन्नेछ। नेपालको मुख्य पर्यटकीय सिजन सुरु हुने समयमा सिधा उडान पुनः सञ्चालन हुन लागेकाले यसले चीनबाट नेपाल आउने पर्यटक तथा पर्यटन र आतिथ्य क्षेत्रलाई सहयोग पुग्ने अपेक्षा एयरलाइन्सले गरेको छ। हिमालय एयरलाइन्सका उपाध्यक्ष विजय श्रेष्ठले काठमाडौँ–साङ्घाई उडानले नेपाल र चीनबीच व्यापार, पर्यटन तथा जनस्तरको सम्बन्ध विस्तारमा सहयोग पु¥याउने बताए।

यात्रुले एयरलाइन्सका टिकट काउन्टर, आधिकारिक ट्राभल पार्टनर, वेबसाइट तथा मोबाइल एपमार्फत टिकट बुक गर्न सक्नेछन्। यात्रुको माग र उडानको यात्रु भारअनुसार आगामी दिनमा उडान संख्या बढाउने विषयमा समीक्षा गरिने एयरलाइन्सले जनाएको छ।