चौथो त्रैमाशमा आर्थिक वृद्धि ४ प्रतिशत हुने प्रक्षेपण, विद्युतको मुख्य योगदान

काठमाडौं। गत आर्थिक वर्षको चौथो त्रैमाश (वैशाखदेखि असारसम्म) मुलुकको आर्थिक वृद्धि ४ प्रतिशत मात्र हुने अनुमान सार्वजनिक भएको छ। राष्ट्रिय तथ्यांक कार्यालयले गत आर्थिक वर्षको चौथो त्रैमाशको राष्ट्रिय लेखा तथ्यांक सार्वजनिक गर्दै यस्तो जानकारी दिएको हो।

विद्युत उत्पादन, प्रसारण, वितरण, निक्षेप संकलन तथा ऋण प्रवाह, निर्जीवन बीमा प्रिमियम संकलन, आवास तथा भोजन सेवा लगायतका क्रियाकलापमा भएको वृद्धिले सहयोग गरेको कार्यालयले जनाएको छ।
समग्रमा अन्तिम त्रैमासमा प्रस्तुत गरिएका कुल १८ वटा औद्योगिक वर्गिकरण मध्ये सार्वजनिक प्रशासन तथा रक्षा बाहेक अन्य औद्योगिक वर्गिकरणमा वृद्धिदर धनात्मक रहेको अनुमान गरिएको कार्यलयले जनाएको छ।

यद्यपि, आर्थिक वर्ष २०८१/०८२ को चौथो त्रैमासिकको तुलनामा आर्थिक वर्ष २०८२०८३ को चौथो त्रैमासिकमा सरकारी खर्चमा भएको कमि र आन्तरिक औद्योगिक उत्पादन तथा कृषि उत्पादनमा भएको सामान्य वृद्धिका कारण यस त्रैमासिकको वृद्धिदर सामान्य अवस्थामा रहेको देखिन्छ।

समायोजित तथ्यांकका आधारमा त्रैमासिक कूल गार्हस्थ्य उत्पादन (जीडीपी) आधारभूत मूल्यमा आर्थिक वर्ष २०८२/०८३ को तेस्रो त्रैमासिकको तुलनामा सोही आर्थिक वर्षको चौथो त्रैमासिकमा १.५४ प्रतिशत वृद्धि भएको प्रारम्भिक अनुमान छ।

आर्थिक वर्ष २०८२/०८३ को चौथो त्रैमासिक र अघिल्लो आर्थिक वर्ष २०८१/०८२ को चौथो त्रैमासिक अवधिबीच क्षेत्रगत तुलना गर्दा अर्थतन्त्रका प्रस्तुत गरिएका १८ ओटा औद्योगिक वर्गिकरणहरू मध्ये १७ वटाको कुल मूल्य अभिवृद्धि वृद्धिदर धनात्मक रहेको प्रारम्भिक अनुमान छ।

जसमध्ये विद्युत तथा ग्याससम्बन्धित क्रियाकलापको सबैभन्दा धेरै वृद्धिदर २४.३६ प्रतिशत रहेको छ। औद्योगिक वर्गिकरणलाई पछ्याउँदै वित्तीय तथा बीमासम्वन्धी क्रियाकलाप, आवास तथा भोजन सेवामा तथा सूचना तथा सञ्चार क्रमशः९.०७, ७.८४ र ७.६६ प्रतिशत वृद्धि भएको प्रारम्भिक अनुमान गरिएको छ।

अर्थतन्त्रमा सबैभन्दा धेरै योगदान पुर्याउने कृषि क्षेत्रको वृद्धिदर १.३५ प्रतिशत हुने प्रारम्भिक अनुमान गरिएको छ।कृषि क्षेत्र र वनपैदावारको उत्पादनमा भएको सामान्य वृद्धिले यस क्षेत्रको कुल मूल्य अभिवृद्धिमा सकारात्मक प्रभाव पारेको देखिन्छ।

त्यसैगरी, अर्थतन्त्रको दोस्रो ठुलो हिस्सा ओगटेको थोक तथा खुद्रा व्यापार क्षेत्रको वृद्धिदर ५.९७ प्रतिशत भएको अनुमान गरिएको छ। व्यापारजन्य वस्तुको स्वदेशी उत्पादन तथा आयातमा भएको वृद्धिका कारणले यस क्षेत्रको वृद्धि हुन गएको देखिन्छ।

अर्कोतर्फ, सार्वजनिक प्रशासन तथा रक्षाको ऋणात्मक वृद्धि ०.१२ प्रतिशत भएको प्रारम्भिक अनुमान गरिएको छ।अन्य औद्योगिक वर्गिकरणहरूको वृद्धि भने सामान्य रहेको प्रारम्भिक अनुमान गरिएको छ।

मुलुकको आर्थिक वृद्धिदर तुलनात्मक रूपमा आर्थिक वर्ष २०७८०७९ को चौथो त्रैमासिकमा सबैभन्दा धेरै र २०७९/०८० को दोस्रो त्रैमासिक सबैभन्दा थोरै देखिन्छ भने अन्य वर्षहरूमा सामान्य घटबढ भएको छ।