मेरो प्रेरणाको स्रोत गिरिजा नै हो : प्रधानमन्त्री प्रचण्ड

काठमाडौँ- प्रधानमन्त्री पुष्पकमल दाहाल प्रचण्डले आफ्नो प्रेरणाको स्रोत नेपाली कांग्रेसका पूर्वसभापति तथा पूर्वप्रधानमन्त्री स्व. गिरिजाप्रसाद कोइराला भएको बताएका छन्। कोइरालाको १००औं जन्मजयन्तीका अवसरमा सोमबार काठमाडौंमा आयोजित कार्यक्रममा प्रधानमन्त्री दाहालले यस्तो बताएका हुन्।

‘अस्पतालमा उहाँ मृत्युसँग जुधिराख्नुभएको थियो। मलाई बोलाएर समाल्नु देश भनेका कुराहरूले मलाई गिरिजाप्रसाद कोइरालाप्रति आस्था, विश्वास भइराख्यो,’ उनले भने, ‘शान्ति र संविधानको रक्षा गर्ने कुरामा मेरो जिम्मेवारी र दायित्व छ भन्ने कुराको प्रेरणाको स्रोत गिरिजा नै हो।’

आफू गणतन्त्र नेपालको पहिलो प्रधानमन्त्रीका रूपमा रहँदा कोइरालालाई राष्ट्रपतिका रूपमा प्रस्ताव गर्नु पर्ने भए पनि नगरेकोमा आफूलाई पश्चात्ताप लागेको उनले बताएका थिए।

‘म गणतन्त्र नेपालको पहिलो प्रधानमन्त्री हुँदै गर्दा गिरिजाप्रसाद कोइरालालाई पहिलो राष्ट्रपति प्रस्ताव गर्नैपर्थ्यो। मैले सकिनँ, मलाई पश्चात्ताप छ,’ कार्यक्रममा उनले भने।

तत्कालीन समयमा प्रचण्डको नेतृत्वमा सशस्त्र द्वन्द्वमा होमिएको माओवादीलाई शान्ति प्रक्रियामा ल्याएर संसदीय व्यवस्थामा अभ्यास गराउन गिरिजाप्रसाद कोइरालाको मुख्य भूमिका थियो।