शीर्ष नेताको बैठक : सहमति कार्यान्वयन गर्ने सहमति !

काठमाडौँ- संसदमा प्रतिनिधित्व गर्ने दलका शीर्ष नेताको बैठकले संसदीय समितिका सभापतिहरूका सन्दर्भमा पुरानो सहमति कार्यान्वयन गर्ने सहमति भएको छ। बैठकमा सहभागी भएको कांग्रेस नेतासमेत रहेका कानुन न्याय तथा संसदीय मामिला मन्त्री धनराज गुरुङले सहमति कार्यान्वयन गर्ने सहमति भएको जानकारी दिएका हुन्।

यसअघि नै प्रमुख प्रतिपक्षी नेकपा एमालेले चार वटा संसदीय समितिको नेतृत्व लिने सहमति भएको थियो। सहमतिअनुसार एमालेले सार्वजनिक लेखा समितिसहित चार समितिको नेतृत्व लिनेछ।

बैठकमा सभामुख देवराज घिमिरे, प्रधानमन्त्री एवं माओवादी केन्द्रका अध्यक्ष पुष्पकमल दाहाल प्रचण्ड, प्रमुख विपक्षी दलका नेता एवं एमाले अध्यक्ष केपी शर्मा ओली, नेपाली कांग्रेसका सभापति शेरबहादुर देउवा र कानुनमन्त्री धनराज गुरुङ सहभागी थिए।

प्रतिनिधि सभामा १० वटा विषयगत समिति छन्। ती समिति गठन भएपनि तिनको नेतृत्व छानिएको छैन। अहिले ज्येष्ठ सदस्यको अध्यक्षता बैठक बस्दै आएको छ।