पोखरा महानगरले हटाउन थाल्यो राजमार्ग क्षेत्रका संरचना

पोखरा- पोखरा महानगरपालिकाले पृथ्वीचोकदेखि कोत्रेसम्मको सडक क्षेत्र अतिक्रमण गरी हटाइएका दायाँबायाँ भागमा बनाइएका संरचना हटाउन सुरु गरेको छ। पोखरा–मुग्लिङ सडक विस्तार आयोजना अन्तर्गत पोखरा महानगर क्षेत्रमा पर्ने पृथ्वी राजमार्गको दायाँबायाँका संरचना हटाउन सुरु गरिएको हो।

सडक किनारमा लामो समयदेखि डम्प गरेर राखिएका पुराना सवारी साधन तथा ग्यारेजसमेत विस्थापन गरिएको छ। संरचना हटाउनका लागि महानगरपालिकाले गरेको आग्रहलाई अटेर गरेपछि महानगर डोजर लिएर सडक क्षेत्र खाली गराउन लागेको हो।

एसियाली विकास बैंक (एडीबी)को सहयोगमा चार लेन बनाउन लागिएको छ। सडक आयोजनाको मापदण्ड अन्तर्गत पोखरा खण्ड ४६ मिटर चौडाइको हुनेछ। सडकको बीच भागबाट २३–२३ मिटर दायाँ–बायाँका संरचनामा डोजर चलाइएको हो।

सडक मापदण्डभित्र पर्ने स्थायी संरचना भने मुआब्जा वितरणपछि भत्काउन थालिनेछ। आयोजना अन्तर्गत पोखरा महानगरभित्र १७० घर भत्काउनु पर्नेछ। हालसम्म ११२ वटा घर एवं भौतिक संरचनाको मुआब्जा वितरण सकिएकोमा ८४ जनाले बुझेका छन्।

सेती नदीमा हाल भएको पुलभन्दा माथि र तल २-२ लेनको दुइटा पुल बनाउन एक अर्ब ७ करोड रुपैयाँमा नेपाली कम्पनी रसुवा कन्स्ट्रक्सनले ठेक्का पाएको छ। सेती पुलबाहेक राजमार्गको पश्चिम खण्डमा ४ वटा ठूला र १२ वटा साना पुल बन्नेछन्।