मैवाखोला ओदकको सिंगो बस्ती अन्यत्र सारिँदै

ताप्लेजुङ–ताप्लेजुङको मैवाखोला गाउँपालिका–४ ओदकका ६४ घरपरिवारलाई स्थानान्तरण गरिने भएको छ। २ असार राती अविरल वर्षासँगै गएको बाढीपहिरोका कारण उच्च जोखिममा रहेका सिंगो बस्तीका घरपरिवारलाई अस्थायी टहरा निर्माण गरी स्थानान्तरण गरिने भएको हो।

शनिबार स्थानीय विपद् व्यवस्थापन समितिको आयोजनामा भएको सर्वपक्षीय बैठकले तत्काल वडा–३ स्थित खुला स्थानमा अस्थायी टहरा निर्माण गरी स्थानान्तरण गर्ने निर्णय गरेको गाउँपालिका अध्यक्ष विजयप्रकाश वनेमले जानकारी दिए। उनका अनुसार अस्थायी टहरा निर्माणका लागि सबै राजनीतिक पार्टी, सुरक्षा निकाय, जनप्रतिनिधिको संयुक्त टोली खटिनेछ।

उनका अनुसार आगामी ७ साउनदेखि उक्त काम प्रारम्भ हुनेछ। यस्तै, स्थानान्तरणका लागि विभिन्न निकायसँग समेत समन्वय गर्ने जनाइएको छ। विपद्का घटनामा सबैले मिलेर अघि बढ्नुपर्ने आवश्यकता देखिएकाले यसमा सहयोग गर्न गाउँपालिका अध्यक्ष वनेमले आग्रहसमेत गरे।

बाढीपहिराका कारण पालिकाको ओदकका बासिन्दा सबैभन्दा बढी प्रभावित बनेका छन्। ओदक बस्तीमा जाने विभिन्न खोलाखोल्साका पुल बाढीले बगाएको छ भने बस्तीका विभिन्न भाग पहिरोले चिराचिरा परेको छ। पहिरोकै कारण यहाँ ओहोरदोहोर गर्नसमेत समस्या छ।