जंगली जनावरको आक्रमणबाट १२ महिनामा १२ जनाको मृत्यु

चितवन– चितवन राष्ट्रिय निकुञ्जमा गत आर्थिक वर्ष २०७९/८० मा जंगली जनावरका कारण १२ जनाले ज्यान गुमाएका छन्। ज्यान गुमाउनेमध्ये बाघ र गैंडाको आक्रमणबाट पाँच/पाँच र दुई जना हात्तीको आक्रमणबाट मारिएका हुन्। उनीहरुलाई जनही १० लाखका दरले राहत दिइएको चितवन राष्ट्रिय निकुञ्जले जनाएको छ।

निकुञ्जका सूचना अधिकारी गणेशप्रसाद तिवारीका अनुसार जंगली जनावरको आक्रमणका कारण गम्भीर घाइते भएका ३१ र सामान्य घाइते भएका २७ छन्। गम्भीर घाइते भएका ३१ जनाको परिवारलाई उपचार खर्चस्वरुप ३२ लाख ८० हजार १७ प्रदान गरिएको छ भने सामान्य घाइते भएका २७ जनाको परिवारलाई ४ लाख २७ हजार १ सय २८ उपचार खर्चबापत प्रदान गरिएको उनले जानकारी दिए।

हात्तीको आक्रमणबाट १७, गैंडाको आक्रमणबाट २१ , बाघको आक्रमणबाट सात, भालुको आक्रमणबाट सात, जंगली बँदेलको आक्रमणबाट ६ जना घाइते भएको निकुञ्जका सूचना अधिकारी तिवारीले बताए। यस्तै, जंगली जनावरका कारण दुई सय ३४ पशुधन क्षति भएको निकुञ्जको तथ्यांकले देखाएको छ। यसको राहतस्वरुप ३१ लाख ३८ हजार चार सय प्रदान गरिएको छ।

भण्डारण गरी राखिएको अन्न बालीमा समेत क्षति पुगेको छ। यसबापत ५१ हजार राहत रकम भुक्तानी गरिएको छ। सोही समय २७ वटा घरगोठमा जनावरले क्षति गरेको उनले जानकारी दिए। यसको क्षतिबापत २ लाख ३४ हजार ९ सय भुक्तानी गरिएको छ। यस्तै, अन्नबालीमा क्षति ५ सय १७ पटक गरेको पाइएको छ। जसको राहतस्वरुप निकुञ्जले ३९ लाख ५८ हजार छ सय २५ भुक्तानी गरेको छ।

निकुञ्जका सूचना अधिकारी तिवारीका अनुसार गत आवमा निकुञ्जका जनावरका कारण ८५६ घटना भएका छन् । यसको राहतस्वरुप निकुञ्जले २ करोड ३० लाख ९० हजार ६९ राहत रकम स्थानीयलाई बुझाएको छ।