अझै भेटिएनन् सामाखुशीमा बाढीले बगाएका बालक, खोजीका लागि सय प्रहरी खटिए

काठमाडौँ- काठमाडौँको सामाखुशीमा बाढीले बगाउँदा बेपत्ता भएका बालकको खोजी कार्य जारी रहेको छ। उनको खोजीका लागि नेपाल प्रहरी र सशस्त्र प्रहरीका १ सय जनाको छुट्टाछुट्टै टोली परिचालन गरिएको सम्बन्धित प्रहरीले जानकारी दिएका छन्।

काठमाडौँ महानगरपालिका–३ रानीबारीस्थित सामाखुशी खोलाको बाढीले बगाउँदा आइतबार साँझ १३ वर्षीय साजन मगर बेपत्ता भएका थिए।

उनको खोजी भइरहेको जिल्ला प्रहरी परिसर काठमाडौँका प्रहरी नायब उपरीक्षक अनिल अधिकारीले जानकारी दिए।

सामाखुशीमा बस्दै आएका मगर पानीपोखरीस्थित भानुभक्त मेमोरियल स्कुलको कक्षा ६ मा अध्ययनरत थिए।

विद्यालयबाट फर्किएपछि उनी साँझ खेल्न निस्केका थिए। मगरको नेपाल प्रहरी र सशस्त्र प्रहरी बलको विपद् व्यवस्थापनको टोलीले खोजी गरिरहेको प्रहरी उपरीक्षक अधिकारीले बताए।

अहिले बालाजु र सोह्रखुट्टेका १०-१० जनाले विष्णुमती खोलामा बालकको खोजीका लागि खटिएका छन्। विपद् उद्धार महाशाखा सामाखुसीबाट २५ जनाको टोली पनि खटिएको छ।

कालिमाटी र कीर्तिपुरका प्रहरीलाई पनि बालकको खोजी गर्न निर्देशन दिइएको छ।

बालकको खोजी गर्न सशस्त्र प्रहरी बलले पनि ५६ जनाको टोली खोजीका लागि जुटेको छ।