सडकसम्म पुग्यो धोबीखोला, काठमाडौँ उपत्यकादेखि बनेपासम्म बाढी [तस्बिरमा]

काठमाडौँ- अविरल वर्षाका कारण काठमाडौंको धोबीखोलाले जल सतह पार गरेको छ। नदी किनारका केही घरहरू डुबानमा परेको स्थानीयले बताएका छन्। सामाखुसी खोलामा पनि जल सतह खतराको तह नजिक पुगेको बाढी पूर्वानुमान महाशाखाले जानकारी दिएको छ।

बाढी पूर्वानुमान महाशाखाले सूचना जारी गर्दै बाढीले जलसतह बढ्दो क्रममा रहेकाले बिहान ११ः०० बजेसम्म उच्च सतर्कता अपनाउन अनुरोध गरेको छ।

महाशाखाका अनुसार बिहान ६ः०० बजे काठमाडौँ उपत्यकाको बूढानीलकण्ठ, सुन्दरीजल, नगरकोट र आसपास क्षेत्रमा भारी वर्षा भएको छ। जसका कारण विष्णुमती, धोबीखोला, मनोहरालगायतमा जलसतह बढ्दो क्रममा रहको र सतर्कतामा पुगेकाले नदी तटीय क्षेत्रमा रहने र नदी किनारको सडकबाट यात्रा गर्नेहरूले उच्च सतर्कता अपनाउन अनुरोध गरिएको छ। काठमाडौँमा आज बिहानैदेखि वर्षा जारी छ।

काभ्रेको व्यस्थ सडको रुपमा रहेको बनेपा पनौति सडक खण्डअन्तर्गत धनेश्वर क्षेत्र डुबानमा परेको छ। मंगलबार बिहान धनेश्वर क्षेत्र भएर बग्ने पुन्यमाता खोलामा पानीको सतह बढ्दा खोला पुलमाथिबाट सडकमा आएको छ।

स्थानीय जनप्रशासन र प्रहरीले बाढीबाट हुने सम्भावित क्षतिबाट बच्न डुवान क्षेत्रका बासिन्दालाई सुरक्षीत स्थानमा जान आग्रह गरेका छन्।

बनेपा र आसपासका क्षेत्रमा भारी वर्षाका कारण नदी र खोलाहरुमा बाढी आएको स्थानीयले बताएका छन्।