सप्तकोसीका ५६ वटै ढोका खोलिए, कर्णाली र नारायणीमा पनि जल सतहले नाघ्यो खतराको संकेत

काठमाडौं– लगातरको झरीका कारण सप्तकोसी, कर्णाली र नारायणी नदीमा पानीको बहाव यो वर्षकै उच्च मापन गरिएको छ। आज बिहान बिहान मापनअनुसार सप्तकोसी नदीमा पानीको बहाव ४ लाख ६२ हजार ३४५ क्युसेक पुगेकाले सर्वसाधारणलाई सतर्क रहन सुनसरी प्रशासनले आग्रह गरेको छ। पानी बहाव बढेपछि कोसी ब्यारेजका सबै ५६ वटौ ढोका खोलिएको सुनसरी प्रहरीले जनाएको छ।

यस्तै, नारायणी नदीको जल सतह पनि सतर्कता तह माथि पुगेको चितवन प्रशासनले बताएको छ। आज बिहान ५ः५१ बजेसम्म नारायणीले सतर्कता तह पार गरेको हो। नारायणी नदीले आइतबार राती ९ः३० बजे सतर्कता तह पार गरेको थियो। मौसम विभागका अनुसार अहिले नदीको जल सतह देवघाटमा सात दशमलव सात मिटर र नारायणी पुल नारायणगढमा ११ दशमलव १५ मिटर छ।

देवघाटमा सात दशमलव तीन मिटर र नारायणगढमा ११ मिटरलाई सतर्कता तह मानिन्छ। नदीमा यसअघि गत २३ असारमा पानीको सतह सात दशमलव ४२ मिटर पुगेको थियो। चितवनमा अहिले पानी पर्न रोकिएको भए पनि अन्य क्षेत्रमा वर्षा भइरहेको छ। नदीमा पानीको सतह निरन्तर बढ्दै गएपछि चितवन र नवलपरासीको नारायणी नदी तटीय क्षेत्रका बासिन्दालाई सुरक्षित रहन आग्रह गरिएको छ।

यसैगरी निरन्तर वर्षा जारी रहेपछि कर्णाली नदीमा पानीको बहाव बढ्दै गएको छ। चिसापानी जलमापन केन्द्रका अनुसार कर्णाली नदीमा पानीको बहाव आज बिहान ५ः५० बजेको मापनअनुसार पानीको सतह ९ मिटर ३३ सेन्टिमिटर पुगेको छ । पानीको सतह १० मिटर पुगेमा सतर्कता तह र १० मिटर आठ सेन्टिमिटर पुगेमा खतरा तह मानिन्छ। गेज रिडर पार्वती गुरुङले कर्णाली नदीमा पानीको सतह बढ्दै गएकाले सतर्कता अपनाउने आग्रह गरिन्।

जल तथा मौसम विज्ञान विभाग, बाढी पूर्वानुमान महाशाखाले पछिल्लो २४ घन्टामा चिसापानीमा ६७ मिलिमिटर वर्षा मापन भएको गेजरिडर गुरुङले जानकारी दिइन्। विभागको महाकाली वेसइन फिल्ड कार्यालय अत्तरियामा पछिल्लो २४ घन्टामा ३७ दशमलव दुई मिलिमिटर वर्षा मापन भएको विभागको महाकाली वेसइन फिल्ड कार्यालय अत्तरियाका मौसम विज्ञान सहायक सिंगल चौधरीले बताए।

वर्षा निरन्तर भइरहेकाले कैलालीका टीकापुर नगरपालिका र जानकी गाउँपालिकाले जोखिम क्षेत्रमा ‘साइरन बजाएर’ सूचना दिन थालेका छन्। पालिकाले ‘गेज स्केल’ निर्माण गरेको छ। पानीको सतह बढ्दै गएमा नागरिक सुरक्षित रहन सहयोग पुगोस् भनी पालिकाले सत्ती पुल नजिक गेज स्केल बनाएको टीकापुर नगरपालिका वन वातावरण तथा विपद् व्यवस्थापन समितिका संयोजक बलिराम चौधरीले बताए।

नदीमा पानीको बहाव बढ्दै गएपछि कटान तीव्र पारिएको टीकापुर–५ स्थित टीकापुर पार्कको सिमानामा नगरपालिकाले बिग बोल्डर हाल्न थालेको छ। नदी कटान तीव्र हुँदा पार्क र बस्ती जोखिममा परेपछि रानीजमरा कुलरिया सिँचाइ आयोजना र पालिका मिलेर बिग बोल्डर (ठूला ढुंगा) हालेर तटबन्ध थालिएको छ।

मनसुनको न्यून चापीय रेखा सरदर स्थानभन्दा नेपालको पहाडी भू–भागको नजिक रहेको र बंगालको खाडीबाट आइरहेको जलवास्पयुक्त हावाको पनि प्रभावका कारण मुलुकभर पानी पर्ने क्रम जारी रहेको जल तथा मौसम विज्ञान विभागको मौसम पूर्वानुमान महाशाखाले जनाएको छ। हाल देशभर पूर्णतया बदली रही सबै प्रदेशका पहाडी भू–भागका केही र बाँकी भू–भागका थोरै स्थानमा पानी परिरहेको छ।