सूचना टाँगेर स्थगित नभए प्रतिनिधिसभा बैठक बस्ने कार्यसूची

काठमाडौं– सोमबार बेलुकी सुन तस्करी प्रकरण छानबिनका लागि उच्चस्तरीय समिति गठन गर्न तीन सदस्यीय कार्यदल निर्माण गर्ने सहमति प्रतिपक्षी एमालेसँग भएपछि मंगलबार खुल्ने भनिएको प्रतिनिधिसभा बैठक बस्दै नबसी सूचना टाँसेर स्थगित गरियो।

१० साउनदेखि मुख्य प्रतिपक्षी एमालेबाट अवरुद्ध हुँदै आएको संसद् बैठक हिजो दिउँसो ३ बजे संसद् सचिवालयले बस्ने भनेर सूचना निकाले पनि दलहरुबीच उच्चस्तरीय समिति गठनको मस्यौदामा हस्ताक्षर गर्न एमाले अध्यक्ष केपी ओली नआएपछि बैठक बस्दै नबसी स्थगित भएको हो। हिजो सूचना टाँगेर स्थगित प्रतिनिधिसभा बैठक आज पनि बस्ने कार्यसूची संसद् सचिवालयले सार्वजनिक गरेको छ।

दिउँसो ३ बजेका लागि बोलाइएको बैठकमा सभामुख देवराज घिमिरेले राष्ट्रपतिको कार्यालयबाट प्राप्त कार्यभार तोकिएको र विधेयक प्रमाणीकरणसम्बन्धी पत्रबारे सदनलाई जानकारी गराउने सम्भावित कार्यसूची छ। प्रधानमन्त्री तथा मन्त्रिपरिषद् कार्यालयबाट प्राप्त कार्यभार तोकिएकोसम्बन्धी पत्र तथा विषयगत समितिमा सदस्य हेरफेरबारे जानकारी गराउनेलगायत कार्यसूची रहेको संसद् सचिवालयले जनाएको छ।

१० साउनयता अवरुद्ध सदनलाई सुचारु गराउने विषयमा दलहरू सहमति नजिक पुगेकाले आजको संसद् बैठक खुल्ने भनिए पनि शंका यथावत छ। संसद् सचिवालयले बैठक प्रभावित हुँदै आएकाले पुरानै कार्यसूचीलाई निरन्तरता दिँदै आएको छ। छानबिन आयोग गठनको विषयमा शीर्ष नेताहरूबीच सहमतिपत्रमा मंगलबार हस्ताक्षर नभएपछि प्रतिनिधिसभाको बैठक स्थगित भएको हो।

मंगलबार विशेष कारणवश बैठक बस्न नसकेको भनेर सभामुखले प्रतिनिधिसभा नियमावली, २०७९ को नियम ६ (३) बमोजिम बैठक बुधबार दिउँसो ३ बजेसम्मका लागि बैठक स्थगित गरेको जानकारी संघीय संसद्का महासचिव भरतराज गौतमले दिएका थिए। आयोग गठनको मस्यौदा तयार गरी मंगलबार दिउँसो शीर्ष नेताहरूले छलफलपछि सहमतिपत्रमा हस्ताक्षर गर्ने तयारी थियो। तर, प्रधानन्यायधीश विश्वम्भरप्रसाद श्रेष्ठको सपथका कारण मंगलबार शीर्ष नेताहरूको बैठक बस्न नसक्ने भएपछि सहमतिपत्रमा हस्ताक्षर रोकिएको हो।

एमाले प्रमुख सचेतक पदम गिरीले आज बिहान ११ बजे शीर्ष नेताहरूको बैठक बस्ने र सहमतिपत्रमा हस्ताक्षर हुने जानकारी दिए। सोमबारको सहमतिबमोजिम एमाले उपाध्यक्ष सुवास नेम्बाङ, कांग्रेस प्रमुख सचेतक रमेश लेखक र माओवादी केन्द्रका प्रमुख सचेतक हितराज पाण्डेले उच्चस्तरीय आयोग गठनको मस्यौदा तयार गरिसकेका छन्।

मस्यौदालाई अन्तिम रुप दिएर प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल प्रचण्ड, कांग्रेस सभापति शेरबहादुर देउवा र एमाले अध्यक्ष केपी ओलीले हस्ताक्षर गरेपछि सुन तस्करी प्रकरणका लागि उच्चस्तरीय छानबिन समिति गठन प्रक्रिया अगाडि बढाउन दलहरुबीच सहमति जुटिसकेको छ।