शेखर कोइरालाको आरोप- बालुवाटारमा बसेर शीर्ष नेता संविधानविरोधी निर्णय गर्छन्

काठमाडौँ- नेपाली कांग्रेसका नेता डा शेखर कोइरालाले दलका शीर्ष नेताले बालुवाटारमा बसेर संविधानविरोधी निर्णय गर्ने गरेको आरोप लगाएका छन्। दलका नेताको अकर्मण्यताका कारण मुलुक भयावह दुर्घटनाको अवस्थामा पुगेको समेत उनको टिप्पणी छ।

‘संविधानले एउटा अधिकार दिएको छ। तर नेताहरु एकठाउँमा बस्नुहुन्छ र आफू अनुकुलका निर्णय गर्नुहुन्छ, यसरी देशलाई कहाँ पुर्‍याउन खोजेको?,’ कोइरालाको प्रश्न छ।

कोशी प्रदेश सरकारको विश्वासको मतबारेको प्रसङ्गमा कोइरालाले अदालतले नगर्नू भनेकै काम शीर्षनेताले गराएको उनको आरोप छ। ‘अदालतले जे नगर्नू भन्यो शीर्ष नेताहरू बसेर फेरि त्यही गर्नुभयो। संविधान र अदालतमाथिको यस्तो बलमिच्याईं कहिलेसम्म?’ उनको प्रश्न थियो।

मोरङको सुन्दरहरैंचामा आयोजित दुलारी सरोकार मञ्चको वाषिर्कोत्सव तथा सम्मान कार्यक्रमलाई सम्बोधन गर्दै कोइराला राजनीतिक दलहरुको चरम राजनीतिले समाज ध्रुवीकरण हुँदै गएको र सामाजिक सदभाव समेत बिथोलिएको बताए।

कार्यक्रममा २०१५ साल देखि हालसम्म निर्वाचित स्थानीय प्रतिनिधि तथा तिनका परिवारलाई सम्मान गरिएको थियो। यसअघि पहिलो पटक उद्धव थापा मुख्यमन्त्रीमा नियुक्त हुने प्रयोजनका लागि समर्थनपत्रमा तत्कालीन सभामुख बाबुराम गौतमलाई हस्ताक्षर गराएपछि डा कोइराला आक्रोशित बनेका थिए। पछि अदालतले सभामुखको हस्ताक्षरलाई मान्यता नदिएपछि उनले आफूले भनेकै दिशामा अदातलले पनि आदेश दिएको भन्दै प्रशंसा गरेका थिए।