प्रहरीले ‘लखेटे’पछि सेती नदीमा हाम्फालेका सन्तोष अझै भेटिएनन्

पोखरा- पोखरामा प्रहरीले लखेटेपछि एक युवा सेती नदीमा हाम्फालेका छन्। बुधबार सेती नदीमा हाम फालेका पोखरा–१ कसेरीका २८ वर्षीय सन्तोष तामाङ अझसम्म पनि सम्पर्कविहीन छन्।

बुधबार सिभिल प्रहरीको टोली चार जना युवालाई लागुऔषध सेवन तथा कारोबारको आशंकामा नियन्त्रणमा लिन पोखरा-१ सिम्पानी नजिकै कसेरी गएको थियो। प्रहरीले रंगेहात पक्रने योजना बनाएको थियो। सन्तोषका तीन साथी पक्राउ पनि परे। तर, सन्तोष भने प्रहरीलाई देखेपछि नदीतिर भागेका थिए। प्रहरीले लखेटेपछि डराएर सन्तोष नदीमा हामफालेको देखेको सन्तोषका भाइको जिकिर छ।

प्रहरीले लखेटेको तर सेती नदीमा हाम फालेपछि उद्धार नगरी फर्केको भन्दै  सन्तोषका आफन्त आक्रोशित बनेका छन्। नदीमा हाम फालेको चार घण्टा घण्टापछि मात्रै प्रहरी खोज्न भनेर सेती नदी किनार पुगेको थियो।

कास्की प्रहरी प्रवक्ता प्रहरी नायब उपरीक्षक श्रवणकुमार विक नै घटनास्थल पुगेका थिए। तर सन्तोष फेला परेका छैनन्।

कसेरीबासीले वडा प्रहरी कार्यालय बगर अगाडि नाराबाजी गरेका थिए। केहीबेर स्थिति तनावग्रस्त पनि बनेको थियो।

प्रहरीले संयमता गुमाउँदा नदीतिर भाग्नुपर्ने वातावरण बनेको र उर्लँदो सेतीमा हाम्फालेपछि पनि तत्काल कुनै उद्धारको प्रयास नगरी नदेखे/नसुनेझैं प्रहरी फर्किएकोमा स्थानीयले नाराबाजी गरेका थिए। कास्की प्रहरीले सन्तोषको खोजी भइरहेको बताएको छ।