आकाशमा देखिँदैछ ५ ग्रह र चन्द्रमाको ‘प्लानेटरी परेड’

काठमाडौं- मंगलबार राति ५ ग्रह र चन्द्रमा एकै वक्रचापमा देखिने भएका छन्। बुध, बृहस्पति, शुक्र, अरुण, मंगल ग्रहसँगै चन्द्रमा एकै लाइनबद्ध भएर एकै चापमा देखिने ज्योतिष गणितकर्ता गोविन्द सापकोटाले बताएका छन्।

मंगलबार राति आकाशमा देखिने यी ग्रहहरु नांगो आँखाले पनि देख्न सकिने छ। यसरी ग्रहहरू एकसाथ देखिने अवस्थालाई खगोलविज्ञानको भाषामा ‘प्लानेटरी परेड’ भन्ने गरिएको छ। यस्तो प्लानेटरी परेड मंगलबार सूर्यास्तपछि देखिने छ। गएको गर्मी याममा पनि बुध, शुक्र, बृहस्पति र शनि ग्रह सँगै, एकै लाइनमा देखिएका थिए।

सूर्यको उज्यालो प्रकाशमा छोपिरहने शनि ग्रह कमै मात्र नाङ्गो आँखाले देख्न मिल्ने हुन्छ। तसर्थ मंगलबार यी सबै ग्रह स्पष्ट देख्न सकिने छैन। त्यसमाथि सहरको उज्यालोबाट भने यो सबै ग्रह देख्न सम्भव हुँदैन।

‘रातको समयमा आकाश सफा भए यी ग्रह र चन्द्रमा एकै चापमा रहेको देख्न सकिने छ। क्षितिजबाट हेर्दा बुध र बृहस्पति भने छिट्टै अस्ताउने छन्,’ सापकोटा बताउँछन् ‘दुई ग्रह भने डिग्रीका हिसाबले एकै ठाउँमा रहने छन्। आज सबै ग्रहहरुको अवस्था चाहिँ एकै लाइनमा नभएर लगभग ५० डिग्रीको अन्तरमा समेटिने देखिन्छ। आकाशमा देखिने प्लानेटरी परेडको यो अवस्था सामान्य प्रक्रिया हो।’

उनका अनुसार शनि र बृहस्पतिसहितका ५ देखि ६ ग्रह एकै ठाउँमा पर्नु नौलो कुरा हो। उनका अनुसार चन्द्रमा, बुध, मंगल, बृहस्पति नांगो आँखाले देख्न सकिन्छ।

नेपाल एस्ट्रोनोमिकल सोसाइटीका अध्यक्ष सुरेश भट्टराईले प्लानेटरी परेड समयसमयमा देखिइरहने बताए।