सांसद शर्माको ठोकुवा- हामी लाग्यौँ भने प्रचण्ड सरकार २४ घण्टा टिक्दैन

काठमाडौँ– नेपाली कांग्रेसका सांसद सुनील शर्माले आफूहरु लाग्ने हो भने सरकार २४ घण्टामै ढल्ने चेतावनी दिएका छन्। काठमाडौंमा आयोजित एक कार्यक्रममा नेताकै कारण देश बर्बाद भएकोसमेत टिप्पणी गरे।

नेताहरूका विरुद्ध आवाज उठाउन ढिला भएको बताएका उनले देशै रित्तिए भने कसको प्रधानमन्त्री बन्ने भन्दै प्रश्न उठाएका थिए।

‘सिंहदरबार घेर्नु पर्छ भने घेरौँ। गान्धीको चर्खा आन्दोलन जस्तै दशौं लाख मानिसहरु सडकमा निस्कौँ र हामी सुतौँ र भनौँ- एउटा मान्छे एउटा पार्टीको ४० वर्षसम्म अध्यक्ष हुन पाउँछ कि पाउँदैन्? कानून त्यहाँ परिर्वतन गर्नु पर्छ हामीले, एउटा मान्छे छ पल्ट प्रधानमन्त्री हुन पाउँछ कि पाउँदैन,’ सांसद शर्माले भने, ‘कानुन हामीले त्यहाँ परिर्वतन गर्नुपर्छ। अमेरिकी स्टाईलमा लैजाऔँ। हामी एक व्यक्ति एक पद दुईपल्ट यति मात्रै चेन्ज गर्‍यौँ भने नेपालको ९० प्रतिशत समस्या समाधान हुन्छ।’

उनले उद्योग वाणिज्य महासंघले आफ्नो क्षमता नबुझेको भन्दै उद्योगीहरुले चाहे २४ घण्टामा सरकार ढल्ने ठोकुवा गरे। ‘एफएनसीसीआईका साथीहरु तपाईहरुले आफ्नो दम बुझ्नु भएको छैन। यो सरकार २४ घण्टा टिक्दैन यदि हामी लाग्यौं भने,’ उनको भनाइ थियो।