अख्तियारका पूर्वआयुक्त पाठक भ्रष्टाचार उद्योगमा दोषी

काठमाडौं- अख्तियार दुरुपयोग अनुसन्धान आयोगका पूर्वआयुक्त राजनारायण पाठक भ्रष्टाचार उद्योगको कसुरमा दोषी ठहर भएका छन्। नेपाल इञ्जिनियरिङ कलेजको विवाद मिलाइदिन ७८ लाख रुपैयाँ घुस लिएको आरोप लागेका पाठकलाई विशेष अदालतले ‘घुस खाने उद्योग’ (घुस खाने प्रयास गरेको तर घुस भने नखाएको) कसुरमा दोषी ठहर गरेको हो।

विशेष अदालतका अध्यक्ष श्रीकान्त पौडेल, सदस्यद्वय यमुना भट्टराई र बलभद्र बाँस्तोलाको संयुक्त इजलासले पाठकले ‘घुस खान खोजेको तर खान भने नपाएको’ व्याख्या गरेको छ। यस्तै व्याख्या घुस दिने पक्ष नेपाल इन्जिनियरिङ कलेजका लम्बोदर न्यौपानेका हकमा पनि गरिएको छ। घुस लिने वा दिनवे उद्योग मात्र गरेको तर घुस भने नदिएको भन्दै दुवैलाई विशेषले भ्रष्टाचारको कसुरबाट उन्मुक्ति दिँदै भ्रष्टाचार उद्योगमा मात्र दोषी ठहर गरेको हो।

यसरी अपराध उद्योग गरेको तर अपराध भने हुन नपाएको अवस्थामा आधा सजाय मात्र प्रावधान छ। त्यसैले उनीहरू दुवैविरुद्ध ३९ लाख रुपैयाँ जरिवाना मात्रै असुल्न विशेषले आदेश गरेको छ। पूर्वआयुक्त पाठकले घुस खान खोजेको र न्यौपानेलाई घुस दिन खोजेको कसुरमा ३/३ वर्ष कैद सजायको फैसलासमेत भएको छ। अख्तियारको आयुक्त विशिष्ट पद भएकाले त्यसमा आसीन भएका कारण उनीमाथि थप ३ महिना कैद हुनेसमेत फैसलामा भनिएको छ।

न्यौपानेले दिएको घुस रकम दुई पटकमा पाठकलाई बुझाइएको थियो। घुस रकम दिने ज्ञानेन्द्र झाले पुर्‍याइदिएका थिए। त्यसको भिडियो ध्वजमान मोक्तानले खिचेका थिए। आफूहरूले ७८ लाख रकम दिएको बयान दुवैले दिएका छन्। तर अदालतले भने यसमा अनदेखा गरेको छ।

अख्तियारको अनुसन्धानले भने पाठकले घुस लिइसकेको तर फिर्ता गर्न नमान्दा भिडियो बाहिर लिक भएको निष्कर्ष निकालेको थियो। ‘घुस रकम लिने दिनेसम्मको कार्य सम्पन्न हुन नपाएको हुँदा भ्रष्टाचारको उद्योगमा कसुर गरेको देखिन आयो,’ फैसलामा उल्लेख छ।

लम्बोदर न्यौपानेले भक्पुरस्थित नेपाल इञ्जिनियरिङ कलेजको सम्पत्ति निजी बनाउन खोजेका थिए। कलेज अध्यक्ष लम्बोदर न्यौपानेले सरकारी सम्पत्ति कलेजको नाममा बनाएको र कलेजको सम्पत्ति आफ्नो नाममा बनाउन अख्तियार दुरुपयोग गरेको विषयमा आयोगले अनुसन्धान गरेको थियो। उनीहरूबीच एक करोड ५० लाख रुपैयाँमा डिल भएको थियो। ७८ लाख बुझाएपनि बाँकी रकम काम सम्पन्न भएपछि बुझाउने कबुल थियो।