कानुनमन्त्री गुरुङका अभिव्यक्तिप्रति अधिकारकर्मीको आपत्ति

काठमाडौँ- कानुनमन्त्री धनराज गुरुङका अभिव्यक्तिप्रति जवाफदेहिता निगरानी समितिले आपत्ति जनाएको छ। उपप्राध्यापक प्रेम चलाउनेको ‘न्यायिक अधिकार’अवरोध हुने गरी मन्त्री गुरुङले अभिव्यक्ति दिएको भन्दै समितिले शुक्रबार विज्ञप्ति जारी गरी आपत्ति जनाएको हो।

त्रिभुवन विश्वविद्यालयका उपप्राध्यापक प्रेम चलाउनेको ज्यान मार्ने उद्योग सम्बन्धी काठमाडौं जिल्ला अदालतमा विचाराधीन मुद्दा प्रभावित हुने गरी गुरुङले अभिव्यक्ति दिएको समितिको भनाइ छ।

‘दलगत राजनीतिको साँघुरो घेरामा रहेर आरोपित नेविसंघका नेता तथा कार्यकर्तालाई उन्मुक्ति दिने उद्देश्यबाट अदालतमा विचाराधीन मुद्दामा कानुनमन्त्री गुरुङले आरोपितलाई ‘निर्दोष’ भएको ठहर गरी विभिन्न सञ्चारमाध्यममा दिएका अभिव्यक्ति लोकतान्त्रिक मूल्यमान्यता विपरीत हुनका साथै पदीय मर्यादा विपरीत पनि भएको निगरानी समितिको ठहर छ,’ समितिको विज्ञप्तिमा उल्लेख छ।

‘नागरिकको मौलिक हकको रक्षा गर्नुपर्ने सरोकारवाला सरकारका मन्त्रीले आफ्नो क्षेत्राधिकार नाघेर न्यायालयलाई प्रभाव पार्ने एवं ‘ज्यान मार्ने उद्योग’का आरोपितलाई बचाऊ गर्नेगरी सार्वजनिक अभिव्यक्ति दिनु स्वतन्त्र न्यायपालिकाप्रति अनास्था तथा अविश्वासको वातावरण निर्माण गर्ने र पीडितको न्यायिक अधिकारमाथि अवरोध हुनसक्ने कार्य भएकाले अत्यन्तै निन्दनीय एवं आपत्तिजनक छ,’ समितिको विज्ञप्तिमा उल्लेख छ। उसले कानूनमन्त्री धनराज गुरुङलाई पदीय मर्यादाबाट विचलित नहुन र चलाउनेको न्यायिक अधिकार सुनिश्चित गर्न सरकारसँग मागसमेत गरेको छ।