नेम्वाङलाई राजकीय सम्मान दिइने, छोरा र एमाले नेता विदेशबाट फर्कँदै

काठमाडौँ- मंगलबार बिहान संविधान सभाका अध्यक्षसमेत रहेका एमालेका उपाध्यक्ष सुवास नेम्वाङको निधन भएपछि प्रधानमन्त्री पुष्पकमल दाहालले मन्त्रिपरिषद्को आकस्मिक बैठक बोलाएका छन्। दिवंगत नेम्वाङको पार्थिव शरीरलाई राजकीय सम्मानका बिदाइ गर्ने निर्णय गर्न प्रधानमन्त्रीले मन्त्रिपरिषद् बैठक बोलाएका हुन्।

राजकीय सम्मानका साथ उनको शव अस्पतालबाट निकालिने भएको छ।

नेम्वाङको निधन भएपछि उनका दुई छोराहरू विदेशबाट फर्कने क्रममा छन्। यस्तै एमालेका महासचिवसहितको टोली पनि चीनबाट भ्रमण छोट्याएर फर्कने भएको छ।

उनको निधनपछि नेकपा ऐमालेका सम्पूर्ण पूर्वनिर्धारित कार्यक्रम स्थगित भएका छन् भने सुदूरपश्चिमको धनगढीमा तय भएको समाजवादी मोर्चाको सन्देशसभा पनि स्थगित गरिएको छ।

श्रद्धाञ्जलीका लागि एमाले पार्टी कार्यालय च्यासलमा नेम्वाङको पार्थिव शरीर राखिनेछ। मंगलबार दिनभर श्रद्धाञ्जलिका लागि राखेर बुधबार अन्त्येष्टि गरिने एमालेले बताएको छ।

नेम्वाङको निधनमा राष्ट्रपति रामचन्द्र पौडेल, प्रधानमन्त्री पुष्पकमल दाहाल, सभामुख देवराज घिमिरे, कांग्रेस सभापति शेरबहादुर देउवा, नेकपा एकीकृत समाजवादी अध्यक्ष माधवकुमार नेपाललगायतले दुःख व्यक्त गरेका छन्।