संविधान दिवसमा विभूषण नबाँढिने, करप्रणाली सुधारका लागि अध्ययन समिति गठन

काठमाडौँ- सरकारले तत्कालका लागि विभूषण वितरण गर्ने कार्य स्थगन गरेको छ। शुक्रबार बसेको मन्त्रिपरिषद् बैठकले यस्तो निर्णय गरेको हो।

विभूषणका विषयमा अध्ययन गर्नका लागि कार्यदल गठन गर्नेसमेत निर्णय सरकारले गरेको छ। कार्यदलले अध्ययन गरी प्रतिवेदन बुझाउन तीन महिनाको समय पाउनेछ। यसअघि सरकारले संविधान दिवसका दिन विभूषण वितरण गरिँदै आएको थियो।

‘विभूषण वितरण कार्यलाई मर्यादित एवं थप व्यवस्थित गरी विभूषणको गरिमा बढाई राष्ट्रको सम्मानको रुपमा स्थापित गर्न अन्तर्राष्ट्रिय अभ्यास र विभूषणसम्बन्धी प्रचलित कानुनसमेतको अध्ययन गरी तीन महिनाभित्र प्रतिवेदन पेश गर्ने गरी कार्यदल गठन गर्ने। हाललाई विभूषण वितरण कार्य स्थगन गर्ने निर्णय भएको छ,’ एक मन्त्रीले भने।

यस्तै कर प्रणालीको सुधारका लागि पूर्वमन्त्री विद्याधर मल्लिकको संयोजकत्वमा समिति गठन गर्ने निर्णय समेत सरकारले गरेको छ।

यसैगरी, साल्ट ट्रेडिङ कर्पोरेसन र खाद्य व्यवस्था तथा ब्यापार कम्पनी लिमिटेडलाई ५० प्रतिशत भन्सार महसुस छूट गरी १०/१० हजार मेट्रिक टन चिनी आायात गर्न स्वीकृति दिने निर्णयसमेत सरकारले गरेको छ।

यस्तै  सिंचाई नीति, २०८० स्वीकृत गर्ने र नेपाल नागरिकता (तेस्रो संशोधन) नियमावली, २०८० स्वीकृत गर्ने निर्णयसमेत मन्त्रिपरिषद्ले गरेको छ। विधायन सम्बन्धमा व्यवस्था गर्न बनेको विधेयक संघीय संसदमा प्रस्तुत गर्न स्वीकृतिसमेत दिइएको छ।

शुक्लाफाँटा राष्ट्रिय निकुञ्जपीडित जनताको न्यायिक समस्या स्थायीरुपमा समाधानका लगि अधिकारसम्पन्न न्यायिक आयोग गठन गर्नेसमेत निर्णय भएको छ।