दुर्गममा केन्द्रित नेपाल टेलिकम, कहाँ-कहाँ पुग्यो मोबाइल सेवा?

काठमाडौँ– दूरसञ्चार सेवा प्रदायक कम्पनी नेपाल टेलिकमले पछिल्लो समय विकट र दुर्गम क्षेत्रलाई केन्द्रित गरेर सेवा विस्तार गर्दै आइरहेको छ। सबै नागरिकलाई सञ्चार सुविधामा पहुँच स्थापित गर्न टेलिकमले सेवा प्रवाहलाई हिमालपारिदेखि दुर्गम र विकटमा सेवालाई विस्तारलाई जोड दिन थालेको हो।

अहिले टेलिकमले टुजी, थ्रीजीसँगै फोरजी सेवा देशभर पुर्‍याइसकेको छ। पछिल्लो समय टेलिकमको फोरजी सेवा सेवा विस्तार तथा गुणस्तर सुधारमा पनि विभिन्न समयमा काम भइरहेका छन्। ग्राहक तथा उपभोक्तालाई गुणस्तरीय र सर्वसुलभ सेवा उपलब्ध गराउन टेलिकमले भइरहेको सेवालाई थप मजबुद बनाउने, मर्मतसम्भार गर्ने, सेवाको पहुँच र गुणस्तरीय बनाउने काम एकसाथ गरिरहेको टेलिकमका प्रवक्ता शोभन अधिकारी बताउँछन्।

पछिल्लो एक दशकको अवधिमा टेलिकमका कुनै सुविधा नपुगेका देशका कुनाकन्दरामा फोरजी सेवा पुगिसकेको छ। टेलिकमले हिमाल पारीको जिल्ला भनेर चिनिने मनाङ र मुस्ताङमा ६ वर्षअघि नै जीएसएम सेवा पुर्‍याइसकेको छ। मुस्ताङको अतिविकट मानिएको स्याङबोचे भ्यू प्वाइटमा जीएसएम सेवा सञ्चालनमा आएपछि त्यसक्षेत्रका छुसाङ, समर, घमी, सुरखाङ र माथिल्लो मुस्ताङलगायतका ग्राहकहरु प्रत्यक्ष लाभान्वित भइरहेका छन्। त्यसक्षेत्रमा टेलिकमले सेवा थप गर्दै फोरजी सेवासमेत चाँडै लन्च गर्ने तयारीमा छ।

दोलखाको डाँडाखर्कमा जीएसएम मोबाइल सेवा वि.सं २०७४ सालमै पुर्‍याइसकेको थियो। पछिल्लो पटक गत २०८० साउन पहिलो साता टेलिकमले आफ्नो सेवा संखुवासभाको भोटखोला गाउँपालिका १, किमांथाकामा जीएसमएम(टुजी) मोबाइल सेवा पुर्‍याएको छ। उक्त क्षेत्र संखुवासभाको दुर्गम उत्तरी क्षेत्र पर्दछ। त्यस्तै, सो क्षेत्रका फ्याक्सिन्दा, इम्चुङ, मावादिन, मानेभन्ज्याङलगायतका क्षेत्रमा पनि टेलिकमले ४ वर्षअघि नै जीएसएम र थ्रीजी मोबाइल सेवा विस्तार गरिसकेको छ। त्यसक्षेत्रमा छिट्टै नै फोरजी सेवा विस्तार गर्ने टेलिकमको योजना छ।

ताप्लेजुङ लेलेपको लोवाडाँडामा निर्माण गरिएको फोरजी प्रविधि जडान गरिएको टेलिकमको टावर।

ताप्लेजुङको दुर्गम फक्ताङलुङ गाउँपालिका ६ लेवाडाँडामा टेलिकमको फोरजी सेवा हालै विस्तार भएको छ। टेलिकमको बिटीएस टावरमार्फत जिल्लाको माथिल्लो क्षेत्रमा फोरजी सेवा यसै महिना पुगेको हो। त्यस्तै, भदौ महिनामा नै गोसाइकुण्ड पुग्ने भक्तजनकको सुविधालाई मध्यनजर गर्दै टेलिकमले भिस्याट प्रविधिबाट जीएसएम(टुजी) मोबाइल सेवा पनि विस्तार गरिसकेको छ।

गत आव २०७९/०८० मा टेलिमले सोलुखुम्बुका अतिविकट ८ स्थानमा जीएसएम(टुजी) र फोरजी सेवा पुर्‍याएको थियो। जिल्लाको खुम्बु पासाङ गाउँपालिका वडा नम्बर २ र ३ का लुक्ला, सुर्के, मुसे, नाजपिङ, चौरीखर्क, स्याङमा, नाम्चे र काङदे, जोसल्लोलगायतका क्षेत्रमा सेवा पुर्‍याएको हो। व्यावसायिक रुपमा प्रतिफल नदिने र बढी लगानी हुने ती क्षेत्रमा टेलिकमले आफ्नो नेटवर्क विस्तार गरिसकेको हो।

झन्डै ४ वर्षअघि टेलिकमले ताप्लेजुङको विकटक्षेत्र घुन्सामा पनि सेवा उपलब्ध गराइएको छ। टेलिकमले त्यसबेला आफ्नो ३ हजार ८२५ मिटर उचाइको बिटीएस टावर निर्माण गरी टावरमार्फत घुन्सा, थामे, ज्याल्पा र कञ्जनजंघा बेसक्याम्प आदि क्षेत्रमा सेवा दिइसकेको टेलिकमले जनाएको छ। त्यति बेला नै टेलिकमले डोल्पाको मुकोट र शे फोक्सुन्डोमा समेत सेवा पुर्‍याइसकेको छ। त्यसक्षेत्रमा पर्ने अति विकट छार्का तान्सुङ गाउँपालिकाका दुई वडा र काइके गाउँपालिकाका दुई वडा तान्छिन र खानीगाउँमा समेत टेलिकमले आफ्नो सेवा पुर्‍याइसकेको छ।

गत आवमा टेलिकमले बागलुङको जैमिनी नगरपालिका वडा नम्बर ६, ७ र ८ क्षेत्रमा पनि फोरजी सेवा विस्तार गरेको छ। जैमिनी नगरपालिका ७ जैदी पाहाकोटमा बिटीएस टावरको क्षमता अभिवृद्धि गर्दै टेलिकमले अर्जेवा, जैदी, छिस्तीलगायतका क्षेत्रमा फोरजी सेवा पुर्‍याएको हो। ती क्षेत्रहरु पनि जिल्लाको भौगोलिक हिसावले टाढा र विकट क्षेत्र मानिन्छन्।

गोसाइँकुण्डमा नेपाल टेलिकमको टावर।

गत वर्ष नै जिल्लाको तमान गाउँपालिका ४ लाममेलामा समेत टेलिकमले थ्रीजी मोबाइल सेवा पुर्‍याइसकेको छ। बीटीएस टावरबाट अप्टिकल फाइबरमार्फत नेटवर्क पुर्‍याइ लाममेलामा सेवा विस्तार गरिएको हो। करिब २ वर्ष पहिले नै बागलुङ, रुकुम र रोल्पा तीन जिल्लाको संगमस्थल रहेको तिलाचनधुरीमा समेत टेलिकमले आफ्नो सेवा पुर्‍याइसकेको छ। पातीहाल्ने नामले परिचित उक्त क्षेत्रमा टेलिकमले टुजी र फोरजी सेवा एकैसाथ सञ्चालनमा ल्याएको थियो।

‘टुप्पीभन्दा माथि ठाउँ छैन, गुर्जाभन्दा माथि ठाउँ छैन’ भनेर चिनिने म्याग्दीको दुर्गम गाउँ गुर्जामा समेत टेलिकमले आफ्नो सेवा पुर्‍याइसकेको छ। २ वर्षअघि टेलिकमले पुरानो भिस्याट प्रविधिलाई विस्थापित गर्दै रेडियो लिङ्कमार्फत थ्रीजी सेवा पुर्‍याएको हो। सदरमुकामबाट २६ कोष टाढा पर्ने उक्त गाउँ भौगोलिक रुपमा अतिविकट छ।

माथि उल्लेखितबाहेक टेलिकमले देशका ७७ वटै जिल्लाका भौगोलिक रुपले विकट र दुर्गम क्षेत्रमा आफ्नो सेवालाई विगतदेखि नै विस्तार गर्दै आइरहेको छ। र, अहिले पनि सेवा विस्तारलाई निरन्तरता दिँदै आएको टेलिकमले जनाएको छ।

टेलिकमले हिमाल र पहाडसँगै तराईका जिल्ला र मूख्य राजमार्ग क्षेत्रमा पनि आफ्नो नेटवर्क विस्तार गर्दै गइरहेको छ। खासगरी, थ्रीजी र फोरजी सेवा देशभर पुर्‍याउने टेलिकमको योजना छ। जसअन्तर्गत गत वर्ष टेलिकमले कर्णाली प्रदेशको हुम्लाको सिमिकोटमा फोरजी सेवा विस्तार गरिसकेको छ। जिल्लाको दुर्गम मानिएको सिमकोट गाउँपालिका वडा नम्बर ७ अर्खनगाउँमा पनि टेलिकमले पहिलो पटक फोरजी सेवा सञ्चालनमा ल्यायो।

दार्चुलाको अपिहिमालमा टेलिकम टावर

टेलिकमले चौथो पुस्ताको फोरजी सेवालाई दुर्गम कर्णाली र सदुरपश्चिमका जिल्लासहित देशभर नै विस्तार गर्ने गरी विभिन्न ठाउँमा बिटीएस टावर निर्माणलगायतका काम गरिरहेको छ।

यस वर्ष टेलिकमले अप्टिकल फाइबरको नेटवर्क विस्तार गर्ने, माइक्रो एपको रेडियोलिंकलाई अपग्रेड गर्ने, क्षमता बढाउने, अप्टिकल कै लिंकहरुलाई पनि क्षमता वृद्धि गर्नेलगायतका योजना बनाएको प्रवक्ता अधिकारी बताउँछन्। ‘राष्ट्रिय राजमार्गका कतिपय ठाउँमा नेटवर्कको समस्या छ। त्यस्ता ठाउँमा हुने नेटवर्क समस्यालाई समाधान गर्ने कार्ययोजना बनाएको टेलिकमको छ,’ उनले भने, ‘अब हामीले सेवा विस्तार गर्दा नयाँ उपकरण गर्दा सेवा अपग्रेड गर्न सकिने उपकरणमा जोड दिने गरेका छौँ।’

अधिकारीका अनुसार फोरजी सेवा देशभर नै पुर्‍याउन सेवा विस्तार गर्ने र समस्या आएका ठाउँमा थप बीटीएस थप गर्दै दुर्गमसम्म नै गुणस्तरीय बनाउने योजनामा टेलिकम छ। ‘यसवर्ष पनि हामीले टेलिकमको सेवालाई दुर्गमसम्म पुर्‍याउन गर्नुपर्ने सबै कामहरु अघि बढाएका छौं। अप्टिकल फाइबर र माइक्रो एपको रेडियो लिंक विस्तार गर्ने देखि क्षमता वृद्धि गर्ने हाम्रो योजना छ,’ उनले भने, ‘अर्कोतर्फ, फोरजी सेवा देशभर नै ९९ प्रतिशत काम सकिइसकेको छ। हामीले समस्या आएका ठाउँमा बीटीएस थपेर देशका बिकट र कुनाकाप्चा सेवा पुर्‍याउने हाम्रो योजना छ।’