गणेशमानको शालिक अनावरण गर्दै राष्ट्रपतिले भने- सत्य र निष्ठाको बाटो हिड्न उहाँबाटै प्रेरणा मिल्यो

भक्तपुर- राष्ट्रपति रामचन्द्र पौडेलले लोकतन्त्रलाई राज्यसञ्चालनको माध्यम मात्र नभएर जीवनदर्शन र संस्कार बनाउनु पर्ने बताएका छन्। भक्तपुरको कटुञ्जेमा गणेशमान वाटिकामा सिंहको पूर्णकदको शालिक अनावरण गर्दै राष्ट्रपति पौडेलले यस्तो बताएका हुन्।

गणेशमान सिंहले देखाएको बाटोमा हिड्न सके मात्र उनीप्रति सच्चा श्रद्धाञ्जलि हुने राष्ट्रपतिको भनाइ छ। ‘त्याग, आदर्श र निष्ठाको राजनीतिलाई मन, वचन र कर्मले गणेशमानजीले निर्वाह गर्नुभएको काम सबैका लागि सँधै प्रेरणा बन्नेछ भन्ने मैले विश्वास लिएको छु,’ राष्ट्रपति पौडेलले भने, ‘राजनीतिलाई सत्ता र शक्तिको साधन होइन राष्ट्रनिर्माणको लागि जीवन समर्पित गर्ने आदर्श, त्याग र निष्ठाको निष्काम कर्म हो भनेर प्रमाणित गर्ने गणेशमानजीको यही जीवन दर्शनको सन्देश हामीले वर्तमान र भावी पुस्तासम्म पुर्याउन सक्नुपर्छ।’

गणेशमानबाट आफूलाई सदैव सत्य, निष्ठा र आदर्शको बाटोमा हिड्न अभिप्रेरित भएको राष्ट्रपति पौडेलको भनाइ थियो। सिंहले २०४६ को आन्दोलन सफल भएपछि तत्कालीन राजाबाट प्रधानमन्त्री पद लिन आग्रह गरेको तर त्यसलाई अस्वीकार गरी आफ्ना समकक्षीलाई सुम्पिएको प्रसङ्ग पनि झिकेका थिए।

वाटिका १७५ रोपनी क्षेत्रफलमा फैलिएको छ। विविध जातका रुख विरुवासहितको पूर्वाधार तथा मनोरम वातावरण बनाइएको छ।

अर्थमन्त्री डा. प्रकाशशरण महतले बाटिकाको बाँकी काम सम्पन्न गर्न सरकारले पूर्णरुपमा सहयोग गर्ने प्रतिबद्धता जनाए। त्यसैगरी सांसद प्रकाशमान सिंहले राजनीतिक परिवर्तनलाई दिगो बनाउनका लागि आर्थिक विकास अपरिहार्य रहेको बताए।

कार्यक्रममा वाटिका निर्माणमा महत्वपूर्ण सहयोग गरेको भन्दै पूर्व सांसद रामेश्वर ढुंगेललाई मरणोपरान्त सम्मान गरिएको थियो। सिंहको शालिक बनाउने मूर्तिकार महेश तुलाधरलाई पनि सम्मान गरिएको थियो।