२७ वर्षको छँदा हत्या गरेका थिए, ६१ वर्षको हुँदा पक्राउ परे

काठमाडौं- २०४६ साल कात्तिक २७ गते भोजपुर साबिक दोभाने गाविस-६ हाल साल्पासिलो गाउँपालिका-५ का बद्रीकुमार राईको हत्या भयो।

दोभाने-७ का तत्कालीन वडाध्यक्ष रामनाथ राईको घरमा सुतिरहेकै रातको समयमा उनको हत्या भएको थियो।

दोभाने-८ का २७ वर्षीय चक्रबहादुर राईसहित चार जनाको समूह रामनाथको घरमा हतियारसहित पसेका थिए।

रामनाथलाई उनीहरूले केही गरेनन्। बद्रीलाई नियन्त्रणमा लिएर उनीहरूले धारिलो हतियार शरीरभरि वर्षाए।

प्रहरीका अनुसार आक्रमण गर्ने क्रममा उनीहरूले बद्रीको बायाँ हात छिनाएर लगेका थिए। हात छिनाएर लगेको केही समयमै अस्पताल पुर्‍याउँदा उनको मृत्यु भएको थियो।

भोजपुरका प्रहरी प्रमुख प्रहरी नायब उपरीक्षक सुदीप पाठकका अनुसार तत्कालीन अवस्थामा उनीहरू सबै फरार भएका थिए।

आफन्त पदमबहादुर राईले दिएको जाहेरीअनुसार चक्रबहादुरसहित चार जनालाई २०६० जेठ २७ गते जिल्ला अदालत भोजपुरले सर्वस्वसहित जन्मकैद फैसला गर्‍यो।

चक्रबहादुर घटना गराउँदा २७ वर्षका थिए। अहिले ६१ वर्षका भएका छन्। यो बीचको ३४ वर्षसम्म उनी कतै फेला परेका थिएनन्।

पाठकका अनुसार उनी घटनापछि भारततिर भागेका रहेछन्।

चक्रबहादुर भागेपछि उनको परिवार बसाइँ सरेर सुनसरीस्थित इटहरी उपमहानगरपालिका-२० तरहरामा बस्न थालेका थिए।

उनी सात-आठ वर्षयता सुनसरी आउने र भारत फर्किने क्रम जारी थियो। उनी आउजाउ गरेको प्रहरीले पत्तो पाएन।

‘केही समययता उनी बंगुर फार्म सञ्चालन गरेर बसिरहेका रहेछन्,’ पाठकले भने, ‘यो सूचना आएपछि हाम्रो टोली तरहरा गयो।’

पाठकका अनुसार शुक्रबार प्रहरी टोली तरहरा जाँदा चक्रबहादुर फेला परे। त्यही दिन राति चक्रबहादुरलाई प्रहरीले पक्राउ गर्‍यो।

उनलाई शनिबार भोजपुर ल्याइयो। प्रहरीले भोजपुरमा आइतबार बिहान पत्रकार सम्मेलन गरी उनलाई सार्वजनिक गरेको छ।

‘हाम्रो बुझाइमा सामसुम भइसकेको होला भनी चक्रबहादुर तरहरा आएर बंगुर पालन गर्न थालेका रहेछन्,’ पाठकले भने।

घटना गराउनुको स्पष्ट कारण खुलिसकेको छैन। तर, चक्रबहादुरको प्रारम्भिक बयानअनुसार बद्रीको त्यसबेला गाउँमा ‘दबदबा’ थियो।

‘वडाध्यक्षसँग निकट भएका कारण उनी अरूलाई हेप्थे, छोरीचेली जिस्क्याउने गर्थे भनी बयान दिएका छन्,’ पाठकले भने, ‘वडाध्यक्षको घरमै हत्या भएको कारण यसमा राजनीतिक, सामाजिक, आर्थिक सबै पाटाहरू जोडिन सक्ने हाम्रो आँकलन छ।’

चक्रबहादुर पक्राउ परे पनि अन्य तीन जना फरार नै छन्। पाठकले एक जना कहाँ छन् पत्ता लागिसकेको बताए।

‘उनलाई पक्राउ गरी ल्याउने तयारीमा छौं,’ उनले भने।

अदालतमा पेश भएको मिसिल नै धुलिइसकेको अवस्थामा चक्रबहादुर पक्राउ परेका हुन्।

बद्रीकुमारको बायाँ हात भने फेला परेन। उनको हात अर्कै व्यक्तिले फ्याँक्न लगेको चक्रबहादुरले प्रहरीलाई बताएका छन्।