बैंकहरू पनि मिटरब्याजीसरह भए : डा शेखर कोइराला

काठमाडौँ- नेपाली काङ्ग्रेसका नेता डा. शेखर कोइरालाले बैंकहरू पनि मिटरब्याजीसरह भएको बताएका छन्।

काठमाडौँको शंखरापुरको वनदेवी आधारभूत विद्यालयमा राकेश हमालको शालिक अनावरण तथा कम्प्युटर ल्याब हस्तान्तरण कार्यक्रममा बोल्दै उनले बैंकहरूमाथि यस्तो आरोप लगाएका हुन्।

देशको आर्थिक अवस्था खतरामा रहेको भन्दै हुनले मिटरब्याजीलाई कारबाही गर्न कानुन बने पनि बैंकहरूका कारण जनता आजित हुने अवस्था आएको बताए।

‘देशको आर्थिक स्तर खतरा छ। मिटब्याजीलाई कारबाही गर्न कानुन बनाएर कारबाही गर्न सुरु गरे पनि अर्को खतरा देखिरहेको छु,’ उनले भने, ‘ बैकहरू मिटरब्याजी हुन् कि भन्ने लागेको छ। ब्याज १३ प्रतिशतसम्म तिराएकोछ। अहिले रेमिट्यान्स आयो भनेर खुसी छौँ। यसले खतरा बढाइरहेको छ। उद्यमशील बनाउन नसके युवाविहीन हुने अवस्थामा पुगिन्छ। राज्यले बीउपुँजी दिनुपर्छ होइन भने अप्ठ्यारो हुदैछ।’

त्यस्तै उनले शिक्षकका माग सरकारले गम्भीर ढंगले लिनुपर्ने बताए।

‘शिक्षकलाई उच्च सम्मान दिएर जान नसके राम्रो हुँदैन। ईसीडी कक्षाको सेवासुविधा पुनर्विचार गरौँ। शिक्षक खुसी नराखी विद्यार्थी राम्रो हुँदैन,’ उनले भने, ‘ संविधानको फ्रेमभित्रै रहेर शिक्षकका माग सम्बोधन गर्नुपर्छ।’

कोइरालाले देशभर अराजकता बढेकोसमेत उल्लेख गरे।

‘देशैभर अराजकता चलेको छ, राजनीतिक अराजकता छ,’ उनले भने, ‘धार्मिक सामाजिक कुटनैतिक सबैमा अराजकता चलिरहेको छ।’

उनले धरान र सर्लाहीमा भएको घटनाले समाजमा डरलाग्दो अवस्था देखिएको बताए।

त्यस्तै कोइरालाले देश युवाविहीन हुने खतरा बनेकोसमेत उल्लेख गरे। देशका दक्ष जनशक्ति विदेश पलायन हुनु राम्रो संकेत नभएको कोइरालाको भनाइ छ।

‘खाडीमा गएकाहरू त फर्केलान तर डाक्टर इन्जिनियर लगायत पलायन हुदैछन उनिहरू पलाएन हुँदा देशको अबस्थाके होला?,’ उनले भने, ‘यी कुरा सुधार गरेर कुरामा पारदर्शी हुन सके, भ्रष्टाचार नियन्त्रण गर्न सके असल नेपाल बनाउन सकिन्छ।’