आलुको पहाड बनाएर महोत्सव तयारी

पोखरा– विष्णुपादुका क्लब पोखरा-२५ हेमजाको आयोजनामा राष्ट्रिय हेमजा आलु महोत्सव–२०७९ चैतको २६ गतेदेखि बैशाख ३ गतेसम्म सञ्चालन हुने भएको छ। महोत्सवको तयारी तिव्र पारिएको छ।

महोत्सवलाई कृषकको महोत्सव बनाउन कृषि विकास निर्देशनालय गण्डकी प्रदेशलगायत कृषि ज्ञान केन्द्र तथा कृषि सञ्जालसँग छलफल भई रहेको महासचिव बसन्त कुमार श्रेष्ठले बताए। उनले कृषि महाशाखाको पहलमा कृषि विशेषज्ञ र कृषक बिच कृषि साझा सवाल आयोजना गरिने बताए। महोत्सवको लागि विभिन्न कृषि निकायसँग समन्वय भइरहेको र आलुको साथसाथै रैथाने बालिको प्रदर्शन गरिने छ।

महोत्सवको आकर्षणको लागि निर्माण गरिने आलुको पहाडको लागि आलु संकलन भइरहेको कृषक परिचालन उपसमिति संयोजक जयराम तिमिल्सिनाले बताए। उनले बुधबारसम्म ५० केजीको ५५० बोरा संकलन भइसकेको र अब ५० बोरा संकलन गर्न बाकी रहेको जानकारी दिए।

आलु तथा ताजा तरकारीको प्रदर्शनी, आलुको ठुलो पहाड निर्माण, आलुका विभिन्न परिकार, विविध सांस्कृतिक कार्यक्रम, राष्ट्रिय स्तरको कृषि दोहोरी गीत प्रतियोगिता, कृषि झाँकी प्रतियोगिता, पप कन्सर्ट, हाँस्य कलाकारहरुका प्रस्तुति, जापानी सुन्तला, च्याउ, कफी, चियाको बिक्री एवम् प्रदर्शनी, कृषि बीउबिजन तथा अन्य कृषियन्त्रको प्रदर्शनीलगायत महोत्सवका आकर्षण हुन्।