गृहमन्त्रीजीले हिजो हेटौँडामा उधुमै खोक्नुभो : ओली

काठमाडौं– प्रमुख प्रतिपक्षी दल नेकपा एमालेका अध्यक्ष केपी शर्मा ओलीले गृहमन्त्री नारायणकाजी श्रेष्ठ आफैं सुन तस्करी ढाकछोप गर्न लागेको आरोप लगाएका छन्।

मंगलबार प्रतिनिधिसभाको बैठकमा बोल्दै उनले गृहमन्त्रीले सुन तस्करीको ढाकछोप गर्ने प्रयास गरेर सुशासनको अभियानको गफ दिँदै हिडेको बताएका हुन्। उनले गृहमन्त्री श्रेष्ठले सोमबार हेटौंडामा उधुमै खोकेको बताए।

‘हिजो माननीय गृहमन्त्रीजीले हेटौंडामा गएर उधुमै खोक्नुभयो। सुशासनको अभियान चलाएको, त्यसलाई रोक्न संगठित रुपमा विरोधीहरु लागेका छन् भनेर। कुन विरोधी लागे तपाईंको अभियान रोक्न ?,’ ओलीले प्रश्न गरे, ‘साढे ९ किलो सुन भेपमा पक्राउ पर्छ, तपाईं ढाकछोप गर्न लाग्नुहुन्छ। १०० किलो सुन पक्राउ पर्छ, ढाकछोप गर्न लाग्नुहुन्छ।’

उनले सुन तस्करीको छानविन गर्न आयोग बनाउने कुरामा पनि एक महिनासम्म लडाइँ गर्नुपरेको बताए। ‘छानबिन समिति बनाऔं भन्दा एक महिनासम्म बनाउने नदिने, छानबिन गर्दा के बिग्रन्थ्यो महाशय तपाईंको? किन आत्तिनुभएको स्वतन्त्र र निष्पक्ष छानबिनसँग,’ ओलीले भने, ‘एक क्विन्टल सुन पक्राउ पर्यो । त्यो ओसार्ने ट्याक्सी ड्राइभर, मेरो सामान हो भनेर बुझ्ने मान्छे, भरिया नै होला, त्यसलाई अलि परतिर पुर्याएर आवश्यक परेको बखत हाजिर हुनेछु भन्ने कागज गराएर मान्छे भगाउ, समान लगाउ, छिटो गर, जाउ भनेर पठाइयो । नत्र किन पठाएको ?’

सुशासनको अभियान भनेर गफ छाँटेको भन्दै उनले सुशासन अभियान नभएर सरकारले नियमित गर्नुपर्ने काम भएको उनको भनाइ थियो।

‘सुशासन भनेको सरकारको नियमित काम हो। सरकारले शान्ति सुरक्षा दिनुपर्छ, भ्रष्टाचार रोक्नुपर्छ, घुस रोक्नुपर्छ,’ उनले भने, ‘सुशासन सरकारको अभियान होइन, नियमित काम हो।’