इजरायल घटना : कांग्रेसले पारित गर्‍यो शोक प्रस्ताव, नागरिकलाई स्वदेश फर्काउन माग

काठमाडौँ-  नेपाली कांग्रेसले, इजरायलमा ज्यान गुमाएका १० जनाको शोकमा शोक प्रस्ताव पारित गरेको छ।

सोमबार बसेको नेपाली काङ्ग्रेसको संसदीय दलको बैठकपछि प्रमुख सचेतक रमेश लेखकले इजरायलमा भएको द्वन्द्वमा परी मृत्यु भएका १० जनाप्रति श्रद्धाञ्जली प्रकट गर्दै शोक प्रस्ताव पारित गरेको जानकारी दिए।

‘इजरायलमा प्यालेस्टाईनी हमास समूहको आतंककारी आक्रमणमा १० जना नेपालीहरुको हत्या भएको छ। नेपाली नागरिक घाईते, सम्पर्क विहीन र जोखिममा रहेको हुँदा १० जनाको मृत्युप्रति श्रद्धाञ्जली प्रकट गर्दै शोक प्रस्ताव पारित गरेका छौँ। त्यो आक्रमणको निन्दा गरेका छौँ।’

यस्तै, उनले तत्काल जोखिममा रहेका मानिसलाई उद्धार गरेर सुरक्षित स्थानमा राख्ने, खान बस्नको व्यवस्था गर्न, हत्या भएका विद्यार्थीहरुको शरिरलाई तत्काल नेपाल ल्याउँने लगायत विषयमा सरकारको ध्यानाकर्षण गराएको पनि बताए।

‘त्यसको साथै तत्काल जोखिममा रहेका मानिसलाई उद्धार गरेर सुरक्षित स्थानमा राख्ने, उनीहरुको लागि खान बस्नको लागि उचित व्यवस्था गर्ने, हत्या भएका विद्यार्थीहरुको शरीरलाई तत्काल नेपाल ल्याउने र परिवारलाई बुझाउँने, सम्पर्क विहीनको खोजी गरेर अवस्था सार्वजनिक गर्ने र नेपाल आउँन चाहनेहरुलाई तत्काल सुरक्षित स्वदेश फिर्ताको व्यवस्था मिलाउनको लागि सरकारको ध्यानाकर्षण गराएको छ,’ उनले भने।

बैठकमा मुलुकको समसामयिक अवस्था तथा गत शनिबार इजरायलमा भएको आतङ्कवादी आक्रमण र त्यसबाट त्यहाँ रहेका नेपाली नागरिकले झेल्नु परेको विषम परिस्थितिका बारेमा छलफल भएको थियो।