सुदूरपश्चिम : रावललाई एक्ल्याउन भण्डारी समूह पनि ओली कित्तामा

धनगढी– मंगलबार राति अबेरसम्म भएका छलफलले पनि सहमतिमा नेतृत्व छान्ने विषय टुंगो लगाउन नसकेपछि नेकपा एमाले सुदूरपश्चिम प्रदेश समिति चुन्न निर्वाचन कार्यक्रम संशोधन गरी प्रकाशन गरिएको थियो। तर एमाले अध्यक्ष ओलीले निर्वाचनबाट नेतृत्व छान्ने कार्यक्रमलाई उचित ठानेनन्।

त्यसपछि महाधिवेशनस्थलमा रहेका महासचिव शंकर पोखरेललाई सर्वसम्मत गराउन पुन: निर्देशन गरे। निर्वाचन कार्यतालिका फेरि भाँडियो।
यसअघि पनि सहमतिका लागि भन्दै कार्यतालिका संशोधन गरिएको थियो।

मंगलबार राति अबेरसम्म सहमतिका लागि भएका सबै प्रयास विफल भएका थिए। तर मंगलबार बिहान भने एकाएक चामत्कारिक परिवर्तन भयो। एमाले सुप अध्यक्षका लागि चुनावी कार्यक्रममा जान चट्टानी अडान लिएर बसेका कमल तिमिल्सिना एकाएक ब्याक भए। कृष्णप्रसाद जैसीलाई सर्वसम्मत बनाउने नाममा उनी ब्याक भएका हुन्।

तिमल्सिना ब्याक हुनुको पछाडिको पक्ष भने दामोदर भण्डारी फ्याक्टर मुख्य कारण हो। दामोदर भण्डारी पक्ष पनि भीम रावललाई एक्लो पार्नका लागि ओली पक्षका उम्मेदवारलाई अध्यक्ष छाडेर भागबन्डामा जान तयार भएपछि तिमल्सिनाको चुनावी दौड टुंगिएको हो। उनले उम्मेदवारी फिर्ता लिइसकेका छन्।

आफूलाई एक्ल्याउने प्रयास भइरहेको कुरा भीम रावलले केही समय अघि पत्तो पाएका थिए। सुरुमा तिमल्सिनाको समर्थनमा उभिने निर्णय गरेका उनले उम्मेदवारको मनोनयन गर्ने बेलासम्ममा नयाँ उम्मेदवार खडा गरे। रावलले भरत साउदलाई निर्वाचनमा उठाउने निर्णय गरेका हुन्।

अन्ततः चुनाव ओली भर्सेस रावलको स्थितिमा पुग्यो। रावललाई एक्लो पार्नका लागि तिमल्सिनाले उम्मेदवारी फिर्ता लिएका हुन्। यद्यपि ओली समूहले रावल पक्षका साउदको पनि उम्मेदवारी फिर्ता गराएर जैसीलाई सर्वसम्मत बनाउने कोसिस गरिरहेको छ। तर रावलको बलियो साथ पाएका साउदले उम्मेवारी फिर्ता नलिने अडान लिएका छन्।

साथै भीम रावल समर्थित प्रतिनिधिहरू भने आफ्नो समूहलाई निषेध गर्ने गरी अभ्यास भइरहेको भन्दै अध्यक्षको प्यानलसहित मतदानमा जाने तयारीमा छन्।

आफूहरूले प्यानल तयार गरिसकेको तर जैसी पक्षका नेताहरू सहमतिका लागि दबाब दिइरहेको रावल पक्षका साउदले जानकारी दिए। ‘नेताहरू सहमतिका लागि दबाब दिइरहनु भएको छ,’ उनले भने, ‘पदाधिकारीमा हामीहरूको प्यानललाई पनि सहभागी गराउने भए हामी त्यसका लागि तयार छौँ। तर त्यस्तो हुने सम्भावना कम छ।’

आफूहरूको समूहलाई एक जना सचिवसहित कम्तीमा दुई पदाधिकारी दिनुपर्ने साउदको अडान छ। उता जैसी पक्ष भने साउद समूहलाई पदाधिकारीमा कुनै पनि पद दिने पक्षमा छैन।

यस्तै माओवादीबाट एमालेमा गएका लेखराज भट्ट वचनबहादुर सिंहलाई अघि सारेका छन्। तर उनीलाई फिर्ता गराउने तयारी भइरहेको छ।

अधिवेशनले १५५ सदस्यीय प्रदेश कमिटी निर्वाचित गर्ने छ। एमाले सुदूरपश्चिममा ६५७ जना प्रतिनिधिले मतदान गर्नेछन्।

एमालेले असोज महिनाभरिमा प्रदेश अधिवेशन गरिसक्ने योजना बनाएको छ। लुम्बिनी, बागमती, कर्णाली र कोशी चुनावबाट नेतृत्व छानिएको छ। उपत्यका विशेष प्रदेशमा भने प्रेम पराजुली सर्वसम्मत अध्यक्ष छानिए।