शेखरलक्षित विश्वको ‘थ्रेड’ : सल्लाहले ‘डिभोर्स’ गर्न मिल्छ, तर घरायसी ठाकठुकमा छिमेकतिर लहसिन हुन्न

काठमाडौँ- नेपाली कांग्रेसका महामन्त्री विश्वप्रकाश शर्माले कोशीमा एमालेको समर्थनमा कांग्रेसका केदार कार्की मुख्यमन्त्री बनेको घटनाप्रति असन्तुष्टि व्यक्त गरेका छन्।

आइतबार एक्समा थ्रेड लेख्दै उनले यस्तो उल्लेख गरेका हुन्।

कोशी घटनालाई आगोको झिल्को नभनी उनले त्यसलाई डडेलो बन्न नदिन संयम र परिपक्व हुन पनि आग्रह गरेका छन्। ”कोशी घटना’ लाई ‘डढेलो’ बन्न नदिन संयम र परिपक्वता राखौं,’ नेता कोइराला समूहप्रति लक्षित गर्दै उनले लेखेका छन्।

‘गणितीय जटिलता’का कारण कांग्रेस गठबन्धन गर्नुपर्ने अवस्थामा पुगेकाले त्यसका राम्रानराम्रा सबै पक्षलाई पनि आत्मसाथ गर्नपर्ने उनको भनाइ छ। कोशीको समस्या समाधान गर्न एमालेसहितको समाधान खोज्न महामन्त्रीहरुले कांग्रेसमा प्रस्ताव गरेको पनि उनले सम्झिएका छन्।

‘काँग्रेस, माओवादी र ‘एस’को गठबन्धन संसद विघटनविरुद्ध बनेर गत चुनावबाट अनुमोदित हो। काँग्रेसको संस्थागत निर्णय पनि यही हो। पुस १० मा टुटेपछि विश्वासको मत नदिन र प्रतिपक्षमा बस्न दुवै महामन्त्री उभियौं। तर पार्टीको संस्थागत निर्णय मान्यौं,’ उनले भनेका छन्।

अर्को गठबन्धन बनाउन सकिने तर यसपालि कांग्रेसको संस्थागत निर्णय नस्वीकारिएको उनको भनाइ छ। यद्यपि यसपालि संस्थागत निर्णयलाई नै चुनौती दिने काम भएको उनको भनाइ छ।

‘यो गठबन्धन छोडेर अर्को गठबन्धन उचित हुन्छ भन्ने लाग्छ भने संस्थागत छलफल गरौं। सँधै यो बोकिरहनुपर्छ, जरुरी छैन। तर संस्थागत निर्णय नगरी हामी कसैले पनि आवेगमा कुनै निर्णय लिनुहुन्न,’ उनको भनाइ छ।

सल्लाहले ‘डिभोर्स’ गर्न मिल्ने तर घरायसी ठाकठुकमा छिमेकतिर लहसिनु नहुने उनको भनाइ छ।

उनको थ्रेड जस्ताको तस्तै:
‘कोशी घटना’ लाई ‘डढेलो’ बन्न नदिन संयम र परिपक्वता राखौं ! ‘गणितीय जटिलता’ अनि पहिचानको आन्दोलन सम्बोधन गर्नुपर्ने आवश्यकता दृस्टिगत गरेर दुवै महामन्त्रीको प्रस्ताव थियो- ‘कोशिमा एमाले सहितको समाधान खोजौं, तर मौजुदा गठबन्धन कायमै राखेर।

‘काँग्रेस, माओवादी र ‘एस’को गठबन्धन संसद विघटन विरुद्ध बनेर गत चुनावबाट अनुमोदित हो। काँग्रेसको संस्थागत निर्णय पनि यहि हो। पुस १० मा टुटेपछी विश्वासको मत नदिन र प्रतिपक्षमा बस्न दुवै महामन्त्री उभियौं। तर पार्टीको संस्थागत निर्णय मान्यौं।

यो गठबन्धन छोडेर अर्को गठबन्धन उचित हुन्छ भन्ने लाग्छ भने संस्थागत छलफल गरौं। सँधै यो बोकिरहनुपर्छ, जरुरी छैन। तर संस्थागत निर्णय नगरी हामी कसैलेपनि आवेगमा कुनै निर्णय लिनुहुन्न।

सल्लाहले ‘डिभोर्स’ गर्न मिल्छ, तर घरायसी ठाकठुकमा छिमेकतिर लहसिनु हुन्न। ‘पुस १०’ पनि नबिर्षौं।

माओवादीको यक्ष प्रश्न- कोशीमा एमाले नेतृत्वको सरकार छोड्यौं, सभामुख छोड्यौं, काँग्रेसलाई दुइपटक ‘ब्ल्याङ चेक’ दियौं। तेस्रोपटकमा हामीले किन नपाउने?

काँग्रेसको एउटा गुटपछि अर्कोले पालो पाउनुपर्ने तर हामीले नपाउनु पर्ने ? यो गठबन्धन दलहरुको कि गुटहरुको ?

कोशी ढुक्कै काँग्रेसको भागमा,कर्णाली माओवादीको या मधेस पुरै जसपाको भन्ने कुनै सहमति भएको छैन। सबै प्रदेशमा आलोपालो हुने हो। परिपक्व ढंगले यो व्यवस्थापन गर्नुपर्छ।

गठबन्धन कि गर्नुहुन्न,गरेपछि राम्रो-नराम्रो सबै ब्यहोर्नुपर्छ। एकल बहुमत नभएपछि सहकार्यको संस्कृति मान्नैपर्छ।

सहकार्यको संस्कृति पालना गर्न हामीलाई निर्वाचनले नै निर्देश गरेको स्थिति हो। गणितनै त्यस्तो छ- एक्लै कुनै दलले संघ या प्रदेशमा नेतृत्व गर्न सक्दैन। यस्तो बेला नेतृत्वले निरन्तर संवाद मार्फत संगठित संयम र एकीकृत परिपक्वता प्रस्तुत गर्न जरुरी छ।

अनि जरुरी छ गम्भीर आत्मसमिक्षा !

व्यक्ति चयनमा संस्थागत प्रक्रिया न सभापतिले अपनाउनु भयो, न ‘फरक विचार समुहको नेता’ले आफ्नै समुहभित्र ‘साझा मत’ खोज्नुभयो। थोरै फरक, करिब उस्तै शैलिले पार्टीको हित हुन्न।

जमाना बदलिएको छ, अब तपाईंहरु बदलिनुस्। हामी बदलिन तयार छौं। पार्टीको हित तपाईं हामी बदलिनुमा सन्निहित छ।

`कोशी घटना´ लाई `डढेलो´ बन्न नदिन संयम र परिपक्वता राखौं !

`गणितीय जटिलता´ अनि पहिचानको आन्दोलन सम्बोधन गर्नुपर्ने आवश्यकता दृस्टिगत गरेर दुवै महामन्त्रीको प्रस्ताव थियो- `कोशिमा एमाले सहितको समाधान खोजौं, तर मौजुदा गठबन्धन कायमै राखेर´ l

— Bishwa Prakash शर्मा (@bishwaprakash77) October 15, 2023