कांग्रेस बुझिसाध्य छैन, कोशीमा फेरि अर्को चलखेल भयो : प्रधानमन्त्री

काठमाडौँ- प्रधानमन्त्री पुष्पकमल दाहालले कोशीमा चलखेल नरोकिएको बताएका छन्। कोशीको चलखेल रोक्नका लागि आफूले प्रयास गरेपनि फेरि अर्को चलखेल भएको उनको भनाइ थियो।

‘कोशीमा दुई गठबन्धन बने। हाम्रो एउटा, एमाले र असन्तुष्ट कांग्रेसको अर्को, लाजमर्दो। यसलाई के गरी हल गर्ने भनेर म, देउवा र शेखर बसेर गठबन्धनमा दृढ छौं, कमजोर पार्न दिने छैनौं भनेर हस्ताक्षर गरियो,’ उनले भने, ‘यति गरेपछि एमालेले गरेको चलखेल त्यहीँ रोकियो भनेको त हिजो फेरि अर्को चलखेल भयो।’

समाजवादी मोर्चाले धनगढीमा आयोजना गरेको कार्कय्रममा बोल्दै नेकपा माओवादी केन्द्रका अध्यक्षसमेत रहेका प्रचण्डले एमालेमा चिरा परेको समेत उल्लेख गरे। उनले कांग्रेसलाई पनि मोर्चाको संज्ञा दिएका थिए।

‘पहिलोचोटि एमालेभित्र ठूला चिरा परेको देखिएको छ। हामीले राम्रो बुद्धि पुर्‍याउने हो भने त्यसलाई सदुपयोग गर्ने सम्भावना बढेको छ,’ उनले भने, ‘कांग्रेस त पार्टी हो कि मञ्च हो कि मोर्चा हो बुझिसाध्य छैन।’

उनले एमालेले पटकपटक प्रयास गरेपनि यो गठबन्धन नभत्कने र पाँचै वर्षसम्म जाने पनि जिकिर गरेका थिए।