कोशी घटनाको जिम्मेवारी देउवाले लिनुपर्नेमा महामन्त्रीद्वय एकमत

काठमाडौँ- कोशीमा घटनाका सम्बन्धमा सभापति शेरबहादुर देउवाले जवाफ दिनुपर्नेमा कांग्रेसका दुवै महामन्त्रीहरू एकमत देखिएका छन्।

देउवाले कसैसँग कुनै छलफल नै नगरी कोशीको नेतृत्व माओवादीलाई छोडिदिँदा कोशीमा कांग्रेसकै सांसदले विद्रोह गर्ने अवस्था निम्त्याउनुमा सबैभन्दा ठूलो कमजोरी सभापति देउवाकै भएकोमा दुवै महामन्त्रीहरू एकमत देखिएका हुन्।

सोमबार सभापति देउवाले बोलाएको छलफलपश्चात् महामन्त्री विश्वप्रकाश शर्माले छलफलमा आफू, सहमहामन्त्री भीष्मराज आङदेम्बे, नेता विजयकुमार गच्छदार, डा. नारायण खड्कालगायत कोही पनि नेतासँग सल्लाह नगरेकोमा देउवासँग आपत्ति जनाएका थिए।

उनको भनाइमा अर्का महामन्त्रीमा गगन थापाले पनि देउवाले नै जिम्मेवारी लिनुपर्ने बताएका थिए।

शर्माले दिएको जानकारीअनुसार बैठकमा महामन्त्रीद्वयले बालुवाटारमा भएको तीन नेताबीचको हस्ताक्षर भएको चिर्कटोप्रति आपत्ति जनाएको पनि बताए। उनले प्रधानमन्त्री प्रचण्ड र देउवाले गठबन्धनलाई निरन्तरता दिन्छु भनेर वक्तव्य दिनु उपयुक्त नभएको बताए।

‘त्यो चिर्कटो बनाइएको विषयमा हामी दुई महामन्त्रीको सहमति छैन,’ शर्माले भनेका छन्।

घटनाका विषयमा सभापतिले गम्भीर आत्मसमीक्षा गर्नुपर्ने उनको भनाइ छ। ‘यसको सबैभन्दा ठूलो जिम्मेवारी, अंशियारी सभापतिले लिनुपर्छ भनेर हामीले कुरा राख्यौं,’ उनले भने।

कोशीको विषयमा भएको घटनाको जवाफ डा. शेखरले पनि दिनुपर्ने धारणा राखे।