मेटाको नाफा बढ्यो, एक्समा मस्कलाई २५ अर्ब डलर घाटा

काठमाडौँ- बहुराष्ट्रिय प्रविधि कम्पनी मेटाको आम्दानी र नाफा बढेको छ। बुधबार सार्वजनिक रिपोर्ट अनुसार जुलाईदेखि सेप्टेम्बरसम्मको तेस्रो त्रैमासमा मेटाको आम्दानीमा २३ प्रतिशत वृद्धि भएको हो। यो अवधिमा उसको आम्दानी ३४ अर्ब १५ करोड डलर पुगेको छ।

सन् २०२२ को तेस्रो त्रैमासिकको तुलनामा यो वर्षको त्रैमासिकमा मेटाको आम्दानी २३ प्रतिशतले बढेको हो। गत वर्ष सोही अवधिको आम्दानी २७ अर्ब ७१ करोड डलर थियो।

मेटाले खर्चसमेत घटाएको छ। गत वर्षको तेस्रो त्रैमासिकमा मेटा कम्पनीको खर्च २२ अर्ब पाँच करोड रहेकोमा ७ प्रतिशतले घटेर २० अर्ब ३९ करोड डलरमा कायम भएको छ।

तेस्रो त्रैमासिकमा मेटाको खुद मुनाफा १६४ प्रतिशतले वृद्धि भएर ११ अर्ब ५८ करोड डलर पुगेको छ। गत वर्षको तेस्रो त्रैमासिकमा मेटाले जम्मा ४ अर्ब ३९ करोड डलर मुनाफा कमाएको थियो।

रिपोर्ट अनुसार फेसबुकका दैनिक सक्रिय प्रयोगकर्ता (एक्टिभ युजर)को संख्या २ अर्ब ९ करोड पुगेका छन्। मासिक सक्रिय प्रयोगकर्ताको संख्या ३ अर्ब ५ करोड छ।

दैनिक सक्रिय प्रयोगकर्ताको संख्यामा यो वर्ष ५ प्रतिशतले वृद्धि हुँदा मासिक सक्रिय प्रयोगकर्ता गतवर्ष भन्दा ३ प्रतिशतले बढेका छन्।

मेटाले खर्च कटाउन १ वर्षमा २१ हजार कर्मचारी कटौती गरेको छ।

उता अर्को प्रविधि कम्पनी एक्स (ट्विटर)को मूल्य भने घट्न पुगेको छ। कम्पनीको मूल्य १९ अर्ब डलर आसपास रहेको उसकै दस्तावेजले उल्लेख गरेको हो। कम्पनीले सोमबार कर्मचारीलाई उनीहरूको उत्कृष्ट कार्य सम्पादनबापत निश्चित अवधिसम्म बेच्न नमिल्ने गरी शेयर अप्शन दिएको थियो। सोही सम्बन्धी दस्तावेजमा कम्पनीको मूल्यांकन गरिएको छ।

व्यापारी एलन मस्कले एक वर्षअघि ४४ अर्ब डलर तिरेर एक्स (ट्विटर) किनेका थिए। क्रयमूल्यका तुलनामा सोमबारको मूल्य ५५ प्रतिशत कम हो।

मस्कले ट्विटर किनेयता कम्पनीमा व्यापक हेरफेर गरेका छन् । कम्पनीका ८० प्रतिशतभन्दा धेरै कर्मचारीलाई कामबाट निकालेका छन्। मस्कले सेवा प्रमाणीकरण प्रक्रियाका साथसाथै कन्टेन्ट हेरफेरको नियममा परिवर्तन गरे।