दशकपछि विश्वकपमा पुग्यो नेपाल

काठमाडौं– नेपाल एक दशकपछि टि–२० विश्वकपमा छनौट भएको छ। शुक्रबार मुलपानी क्रिकेट मैदानमा भएको विश्वकप छनौट खेलको सेमिफाइनल खेलमा यूएईलाई ८ विकेटलाई हराउँदै नेपाल विश्वकपमा छनौट भएको हो। टस हारेर पहिले बलिङ गरेको नेपाललाई यूएईले १३५ रनको लक्ष्य दिएको थियो।

यूएईले दिएको लक्ष्य नेपालले १७.१ ओभरमा २ विकेट गुमाएर भेट्टाएको थियो। नेपालका आशिफ शेखले सर्वाधिक ६३ रन बनाउँदा कप्तान रोहित पौडेलले ३५, गुल्सन झाले २२, कुशल भुर्तेलले ११ रन जोडे। यूएईका लागि बासिल हमिद र निलांश केसवानीले १/१ विकेट लिए।

नेपालका कुशल मल्लले महत्वपूर्ण ३ विकेट लिएका थिए। त्यस्तै सन्दीप लामिछानेले २, सोमपाल कामी र रोहित पौडेलले १/१ विकेट लिएका थिए।

योसँगै अब नेपालले सन् २०२४ को जुनमा अमेरिका र वेष्ट इन्डिजमा हुने टी–२० विश्वकप खेल्नेछ। यसअघि नेपालले सन् २०१४ मा बंगलादेशमा भएको टी–२० विश्वकप खेलेको थियो। काठमाडौंमै भएको अर्को खेलमा बराइनलाई हराएर ओमान पनि विश्वकपमा छनोट भएको छ।

नेपाल र ओमान छनोट भएसँगै विश्वकप खेल्न १८ टोली छनोट भइसकेका छन्। यो विश्वकपमा कुल २० टिमले प्रतिस्पर्धा गर्नेछन्। यो विश्वकपका लागि

वेष्ट इन्डिज र अमेरिका आयोजकको रुपमा सीधै छनोट भएका छन्। २०२२ को टी–२० विश्वकपमा शीर्ष आठमा स्थान बनाएका अष्ट्रेलिया, इंग्ल्याण्ड, भारत, नेदरल्याण्ड्स, न्युजिल्याण्ड, पाकिस्तान, दक्षिण अफ्रिका र श्रीलंका पनि सिधै छनोट भएका छन्।

टी–२० विश्वकपपछि वरियताका आधारमा बंगलादेश र अफगानिस्तानले विश्वकपमा स्थान बनाउँदा आयरल्याण्ड, स्कटल्याण्ड, पपुवा न्युगिनी र क्यानडाले रिजनल क्वालिफायर्सबाट विश्वकपको टिकट काटेका छन्। अब नामिबियामा हुने अफ्रिका क्वालिफायर फाइनलबाट दुई टिम छनौट हुनेछन्।