१९ वर्षीया जमुना, जसले भूकम्पमा श्रीमान् र गर्भको शिशु गुमाइन्

बाँके: जमुना बुढामगर भर्खर १९ वर्षकी भइन् । केही दिनअघिको भूकम्पका कारण उनले श्रीमान् र पेटमा हुर्कंदै गरेको आठमहिने शिशुलाई गुमाइन् । श्रीमान् र शिशुको वियोगमा जमुना एकसुरमा अस्पतालको भित्ता कोट्ट्याइरहन्छिन् । भूकम्पमा परी घाइते उनी हाल नेपालगन्जस्थित भेरी अस्पतालमा उपचाररत छिन्।

गएको शुक्रबार रातिको भूकम्पले जाजरकोटको नलगाढ नगरपालिका–६, भारगाउँकी जमुनाकोे संसार नै अँध्यारो बनाइदिएको छ। भूकम्पपीडितको व्यथा एउटै–एउटैजस्तो देखिन्छ। तर, जमुनालाई आफ्नो व्यथा अरूको भन्दा धेरै गहिरो लागेको छ।

उनले आफ्नो जीवनसाथी र गर्भमा हुर्कंदै गरेको शिशुलाई गुमाएको चार दिन बितेको छ। बितेका चार दिनमा जमुनाको होस पूर्ण रूपमा फर्किएको छैन। श्रीमान् र गर्भमा रहेको शिशुलाई गुमाउँदाको पीडाले उनी अस्पतालको शय्यामा छटपटिरहेकी छन्।

भूकम्पको पीडाले बेहोसी छोरीको होस फर्किए पनि सुरमा कुरा नगरेको देख्दा उनलाई चिन्ताले सताइरहेको छ।

शुक्रबार राति नै भूकम्पमा घरले च्यापिएर उनका ज्वाइँ नवीन बुढाको मृत्यु भएको खबर सुनेपछि गर्भवती छोरीको उद्धार गर्न रुकुम पश्चिमको सानीभेरी गाउँपालिका–९ बाट जमुनाकी आमा पवित्रा खड्कामगर र बुवा भागीराम जाजरकोट पुगेका थिए । घरमा पुग्दा जमुना बेहोस अवस्थामा रहेको बुवा भागीरामले बताए।

“हामीले त ज्वाइँसँगै छोरी पनि गुमायौँ भन्ने सोचेका थियौँ। उसको पेटको नानीलाई बचाउन नसकिए पनि छोरीलाई भने केही भएको रहेनछ,” भेरी अस्पतालमा जमुनाको हेरचाहमा खटिएका उनले भने।

जमुनालाई जाजरकोटबाट नेपाली सेनाको हेलिकोप्टरमार्फत चौरजहारीसम्म र त्यहाँबाट विमानमा नेपालगन्ज ल्याएर आइतबार भेरी अस्पतालमा भर्ना गरिएको हो। पेटभित्र मरेको शिशुलाई निकालिएको छ । शिशुको अन्तिम संस्कार नेपालगन्जस्थित मसानघाटमा नै गरिएको भागीरामले बताए।

जमुनाको उद्धार गर्न जाजरकोट पुगेका भागीराम र उनकी पत्नीलाई आफ्नै घर भूकम्पले चर्किएको भारगाउँ पुगेपछि मात्र थाहा भयो। “हामीले त ज्वाइँ रहनु भएन भन्ने सुन्यौँ । गर्भवती छोरीको सास छ भन्ने थाहा पाउनासाथ हामी छोरी बचाउन जाजरकोट लाग्यौँ। त्यहाँ पुग्दै गर्दा बाटैमा थाहा पायौँ, भूकम्पले हाम्रो पनि घर चर्किएछ ।” दुवैजना शुक्रबार राति नै जमुनाको घर गएका थिए।

अस्पतालमा छोरीलाई निको बनाएर घर लैजान भनी हेरचाह गर्न श्रीमान्सँगै आएकी आमा पवित्रा भन्छिन्, “जसको भाग्यमा जे भोग्न लेखिएको हुन्छ, उसले त्यही भोग्नैपर्छ। हाम्रो छोरीको भाग्यमा यस्तै दुःख भोग्न लेखिएको थियो होला,” उनले भनिन्, “अब छोरी चाँडै निको भइदिए हुन्थ्यो।”

भूकम्प जाँदा जमुना, उनका श्रीमान्, सासू, नन्द र दुई आमाजूसँगै एउटै घरमा खाना खाएर सुतेका थिए। भूकम्पले जमुनाका श्रीमान् र गर्भको शिशुलाई लग्यो। परिवारका अरू सदस्यलाई सामान्य चोट लागेको छ । जमुनाका देवर र ससुरा भने मजदुरी गर्न भारत गएका छन्।

भेरी अस्पतालमा जाजरकोट भूकम्पमा परी घाइते भएका ४४ जनाको उपचार भइरहेको बाँकेका प्रमुख जिल्ला अधिकारी श्रवणकुमार पोखरेलले बताए। उनका अनुसार भेरी अस्पतालमा भूकम्पमा परी घाइते भएका ४७ जनालाई ल्याइएको थियो । दुईजना निको भई घर फर्किएका छन्। उपचार गर्न अस्पताल ल्याउँदै गर्दा एकजनाको बाटैमा मृत्यु भएको थियो ।

प्रजिअ पोखरेलले उपचाररत बिरामीको स्वास्थ्य अवस्था खतरामुक्त रहेको जानकारी दिए।