नेपालमा टिकटक बन्द गर्ने सरकारको निर्णय

काठमाडौँ- सरकारले नेपालमा टिकटक बन्द गर्ने निर्णय गरेको छ।

सोमबार बसेको मन्त्रिपरिषद्को बैठकले नेपालमा टिकटक बन्द गर्ने निर्णय गरेको सरकारका प्रवक्ता तथा सञ्चार तथा सूचना प्रविधि मन्त्री रेखा शर्माले जनकारी दिइन्। टिकटकबाट सामाजिक सद्‍भाव बिग्रिएको ठहर गर्दै सरकारले बन्द गर्ने निर्णय गरेको हो।

‘क्याविनेटले टिकटक बन्द गर्ने निर्णय गरेर सञ्चार मन्त्रालयलाई निर्देशन गर्ने निर्णय भएको छ। निर्णय कार्यान्वयनमा लैजान प्राविधिकहरू लागिसक्नुभएको छ। केही समय लाग्ला तर तत्काल बन्द गर्ने निर्णय भएको छ,’ मन्त्री शर्माले भनिन्, ‘त्यसमा सबैको सहयोग चाहिन्छ। आवश्यक प्राविधिक व्यवस्था गर्न सञ्चार मन्त्रालय र दूरसञ्चार प्राधिकरण तैयारीमा लागिसक्नुभएको छ।’

मन्त्री शर्माका अनुसार टिकटक बन्द गर्ने निर्णय तत्काल कार्यान्वयनमा जाने र यसका लागि कुनै डेटलाइन तोकिएको छैन।

कात्तिक १७ गते टिकटकका प्रतिनिधिलाई सिंहदरवारमा बोलाएर गैरकानूनी सामग्री स्वतः हट्ने व्यवस्था मिलाउन गृह मन्त्रालयले आग्रह गरेको थियो।

गृह मन्त्रालयमा भएको छलफलमा टिकटकमार्फत सामाजिक सद्भाव बिगार्ने, घृणा तथा विद्वेष फैलाउने, विशिष्ट व्यक्तिहरुको मानमर्दन गर्ने, जातीय, धार्मिक, सामाजिक सद्भाव बिगार्ने र अश्लील खालका गतिविधि तथा सामग्री स्वतः हट्ने व्यवस्था गर्नुपर्ने सरकारको आग्रह थियो। तर त्यसबेला टिकटकका प्रतिनिधिले कस्तो जवाफ दिए भन्नेबार सरकारले सार्वजनिक गरेको छैन।

गृह मन्त्रालयका सहसचिव तथा प्रवक्ता नारायणप्रसाद भट्टराईले टिकटकमा प्रकाशन तथा प्रसारण हुने गैरकानूनी सामग्री स्वतः हट्ने व्यवस्था मिलाउनका लागि सिंगापुरस्थित टिकटकको कार्यालयका प्रतिनिधिलाई बोलाएर छलफल भएको बताएका थिए।

‘जिम्मेवार नागरिकको रुपमा कानुनसम्मत शिक्षामूलक र सामाजिक सद्भाव नविगार्ने सामग्री मात्र प्रकाशन, प्रसारण गरी असल नागरिकको भूमिका निर्वाह गर्न र गैरकानुनी कार्य गरेवापत हुने कानूनी कारबाहीबाट बच्न सम्बन्धित सबैमा अनुरोध गरिन्छ,’ गृह मन्त्रालयले जारी गरेको विज्ञप्तिमा भनिएको थियो।

टिकटकका प्रतिनिधिहरुसँग गृह मन्त्रालयमा भएको बैठकमा गृह मन्त्रालयसहित सञ्चार तथा सूचना प्रविधि मन्त्रालय, सुरक्षा निकाय लगायतका सरकारी निकायका प्रतिनिधिहरु सहभागी थिए।